Ha paghandum han mga Pilipino ha Undas, yana nga adlaw handumon liwat naton an ngatanan nga nagin biktima han pangabuso han pasista nga rehimen. Ihatag naton an pinakahitaas nga pagpapasidungong ha ira, ngan utro nga padig-unon an saad nga kab-uton an hustisya pinaagi han pagpakyas ha pasismo han rehimen US-Marcos ngan pagpasulong han gerra han katawhan.

Pasidunggan naton an ngatanan nga kadre han Partido, Pula nga kumander ngan mangaraway, masa ngan kasama nga ginhalad an ira kinabuhi para ha rebolusyon. Tagan naton hin nalalain nga pagkilala an mga kadre han Partido ha Eastern Visayas nga namartir ha nakalabay nga mga tuig, sugad kanda Helenita “Ka Elay” Pardalis, Mariano “Ka Paner” Adlao, Abdias “Ka Omar” Guadiana, Gil “Ka Biboy” Giray, Amadeo “Ka Boy” Adelantar, Rodrigo “Ka Kute” Lorezo, Bernabe “Ka Totoy” Linay, Jaime “Ka Jordan” Soledad, “Ka Mamoy” Sablan, “Ka Kara,” nga “Ka Ali.” Higugmaon naton hira nga mga kasama, sangkay, mga kabakyang ha kuri ngan lipay, ha mga liko ngan birik han panmaihaan nga pakigbisog para ha pagtatalwas han katawhan. Utang naton ha ira sakripisyo an kusog ngan mapaso nga suporta nga gintatagamtaman han rebolusyunaryo nga kagiusan yana.

Hinumdumon naton an mga kasama ngan masa nga patraydor nga ginpatay han pasista nga rehimen. Bug-os kusog naton nga iguliat an hustisya para ha ira. Sukton naton labina hira Marcos ngan Duterte ha ngaran han mga biktima han gerra kontra druga ngan todo-gerra han panmuypoy nga nagtarget diri la ha mga rebolusyunaryo, kundi hasta an mga aktibista, mga kablas ngan ordinaryo nga sibilyan. Aada ha ira mga kamot an dugo han yukut-yukot nga napatay ha kalamidad, kagutom, kakablasan, ngan kawaray serbisyo ngan hustisya tungod ha kriminal nga kapasibay-an ngan kawaray-pulos han ira pan-gubyernuhan.

Nakikibisog kita ha ngaran han mga kasama ngan masa nga waray basaranan nga nag-aantos ha mga prisuhan, ha mga komunidad nga gin-“lockdown,” ngan ha lusak han kakablasan. Pukaw kita nga an hustisya para ha mga biktima han pasista nga estado diri basta nga ighahatag, kundi makakab-ot pinaagi han puno-hin-sakripisyo nga pakigbisog agud pabagsakon an naghahadi nga sistema ngan tukuron an usa nga katilingban nga tinuod nga nagpapasulong han interes han katawhan.

Ha aton dirudiretso nga pagpakyas ha todo-gerra han rehimen US-Marcos, hinumdumon naton nga amkon naton an baul-karikuhan han mga leksyon nga ginhalaran han kinabuhi han katawhan nga naato. Ginpapadig-on hini an aton determinasyon nga magkaurusa, tumapod ha kusog han kada tagsa, ngan maisugon nga ipasulong an gerra han katawhan tubtub makab-ot an hul-os nga kadaugan, anupaman nga ulang an aton atubangon.