Lubos ginakundenar sang Leonardo Panaligan Command-New People’s Army (LPC-NPA) ang wala nagapaminsar nga pahayag ni Gibo Teodoro sang Department of National Defense (DND) nga nagapugong kag indi pagpadayon sang pagpakig-istorya sang kalinong sa tunga sang National Democratic Front of the Philippines (NDFP) kag Government of the Philippines (GRP) sadtong Mayo 2.

Ang pagdumili ni Gibo Teodoro isa ka iresponsable kag maka-elitista nga panindugan batok sa madugay na nga naga-antus nga pumuluyong Pilipino sa madalom nga kaimulon kag kagutom bunga sang bangkarote nga sistemang malakolonyal kag malapyudal nga pungsod Pilipinas.

Ang kahimtang sang pumuluyong Pilipino sa idalum sang malakolonyal kag malapyudal diin lapnagon ang kawad-on kag kakulang sang duta ang 75% nga mangunguma kag mga mamumugon sa uma samtang ang malagpad nga kadutaan sa pungsod ang ginahugakom sang mga pyudalista-dalagko nga agalon may duta. Lapnagon man ang kakulang sang trabaho sang 15% nga sahing mamumugon. Naga-antus kag nagabakho sila sa manubo nga sweldo kag wala kasiguruhan sa trabaho. Sa pihak nga bahin, nagapinagusto kag nagakamol sang super-ganansya ang mga monopolista kag mga dalagko nga kapitalista. Ang mga propesyonal apektado man sang wala-untat nga saka sang mga presyo sang mga balaklon bangud sang wala-untat man nga saka sa presyo sang langis nga resulta man sa oil deregulation law. Dugang pa ang wala kabulusgan nga korapsyon sang mga burukrata kapitalismo nga sistema sa gobyerno imbes magkadto sa mga pumuluyo para sa mga nagakaigo nga serbisyo sosyal nga bilyon-biyon ang ginabulsa sang mga pulitiko.

Ang ini nga mga kahimtang sang pumuluyong Pilipino madugay na nga panahon nga wala matag-an sang kasolbaran nga halos puro lang pasalig bisan pa sa mga nag-agi nga rehimen sa pungsod kag bisan pa sa karon nga rehimen ni Presidente Bongbong Marcos, wala niya masolbar ang mayor nga solusyon sa problema sang pumuluyo nga amo ang matuod nga reporma sa duta kag ang pungsodnon nga industriyalisasyon.

Amo man ini ang rason kon nga-a nagapadayon ang paghimakas sang pumuluyong Pilipino para matagaan kasolbaran ang ila mga problema rason kon nga-a madamo sang pumuluyo ang nag desisyon nga mag-upod sa gyera sang pumuluyo nga kubos kag ginahimuslan batok sa manughimulos kag nagahari nga sahi sa pungsod.

Suno pa kay Gibo Teodoro indi siya pabor sa pagpadayon sang Peacetalk sa tunga sang NDFP kag GRP kay ini ang mga terorista pero ang matuod ang karon nga rehimen amo ang matuod nga terorista kontra sa pumluyong Pilipino. Numero uno nga nagapanglapas sa tawhanon nga kinamatarong nga ara nasaad sa 1987 nga konstitusyon, pareho sang pagpamatay sa mga lider sa mga hayag nga organisasyon, pagpangdakop kag pagpamahog sa ila madudahan nga mga nagasuporta sa paghimakas kag iban pa nga porma sang pagpang-ipit sa pumuluyo. Buot hambalon, ang rehimen ni Marcos Jr amo ang matuod nga naga terorista.

Padayon nga nagala ang krisis sang malakolonyal kag malapyudal nga kahimtang sang pungsod. Nagalala man ang krisis sa ekonomiya kag pulitika nga naga resulta sa pagpadayon sang gyera sang pumuluyo batok sa karon nga rehimen. Diri kinahanglan nga masolbar ang kontradiksyon sa tunga sang 99% nga katawhan nga gusto sang pagbag-o sosyal batok sa 1% nga amo ang nagakontrol sa ekonomiya kag pulitika sa pungsod.

Partikular sa Negros, lapnagon ang kakulang sang trabaho magluwas pa sang indi makatarunganon nga sweldo kag kakulang sang benepisyo ang madugay na nga gina-atubang sang mga mamumugon sa kampo sa mga hacienda. Dugang pa ang inutil nga implementasyon sang peke nga reporma sa duta sa baylo nga buligan ang mga mangunguma, mas ginalubong ini sa kapigaduhon bunga sa paghigot sa ila sa iskema sang pagpautang. Indi man makatibawas ang dako nga isip sang mga small-planters bangud sang wala kasiguruhan kag manubo nga presyo sang kalamay sa pihak nga ginakilala ang Negros nga “sugarbowl” kag amo man ang nagapanguna nga naga-prodyuser sang kalamay. Halos kontrolado sang dalagko nga mga negosyante kag kapitalista ang presyo sa merkado. Samtang ang kakulang sang serbisyo sa pumuluyo para makabulig padasig kag pagpataas sa ila produksyon. Nagpabilin ang kalabanan sa atrasado nga mga kagamitan sa produksyon bangud sang pagka-uyaya sang gobyerno sa hambalanon sang serbisyo sosyal kaangay sang libre nga abono, abanse nga kagamitan sa produksyon kag subsidyo sosyal sa tion sang mga kalamidad.

Gani ang Leonardo Panaligan Command-New People’s Army mabaskog nga nagasuporta sa pagpadayon sa Peacetalk upod sa malapad nga pumuluyong Pilipino sa tunga sang NDFP nga nagatiglawas sang bug-os nga rebolusyonaryong pwersa sa pagpamamuno sang Communist Party of the Philippines kag GRP para mapaluntad ang matuod nga kalinong kag katawhay nga nakabase sa hustisya sosyal.