Ginpatuman han Bagong Hukbong Bayan ha Leyte an sirot kamatayon kontra ha lanong nga parupanlugos ngan aktibo nga ahente han militar nga hi Catalino “Imbaw” Mallorca, 56, residente han Barangay Pinamonoan, Mahaplag, Leyte, hadton Mayo 14, 9:02 han gab-i.

Ginpatuman an sirot kahuman mapamatud-an han mga imbestigasyon han BHB nga responsable hi Mallorca ha paglugos han iya menor de edad nga anak nga babayi, nga 15 anyos pala hadto ngan nagsumat paglabay hin usa katuig.

Nakit-an liwat han BHB nga salaan hi Mallorca ha pira kabeses nga pagpinan-hiling, panaka ha kabablayan, ngan iba pa nga pambabastos ha kababayin-an, sugad liwat an pira kabeses nga pagkawat.

Pira kabeses na nagreklamo an kalugaringon nga pamilya ni Mallorca, an iya mga biktima ngan iba pa nga residente ha kapulisan nga waray man ginhimo.

Labot ha pagin maraut nga elemento, lanong liwat nga kontra-rebolusyunaryo hi Mallorca. Nagin aktibo hiya nga ahente han militar, kun diin regular hiya nga naupod ha mga pankombat nga operasyon dara an gin-isyu ha iya nga uniporme han sundalo ngan riple nga M-16. Nagserbe hiya komo impormer ngan giya ha mga sundalo ha mga pankombat nga operasyon ha Pinamonoan ngan mga kasapit nga baryo.

Nagreklamo liwat an mga residente nga parag-uma kun tiunan-o hiya naghihinimu-himo hin mga buwa nga report ha militar, nga nakakaringgal ha ira kinabuhi ngan pakabuhi.