Hugot nga ginakundenar sang Armando Sumayang Jr Command-New People’s Army (ASJC-NPA) ang wala katarungan nga pagpatay kay Warlita Jimenez, 55 anyos, isa ka lider mangunguma sa Sitio Makilo, Barangay Camansi, Kabankalan City, Negros Occidental kag asawa sang lider mangunguma nga si Joseph Jimenez nga ginpatay sang 15th IB sadtong Nobyembre 30, 2022. Upod ni Jimenez nga ginpatay sa sina nga panahon amo si National Democratic Front (NDF) consultant Ericson Acosta.

Ginpatay si Warlita sa ala 1:40 sang kaagahon sang Disyembre 23 sa indi magnubo sa 10 ka elemento sang pasistang Armed Forces of the Philippines (AFP) upod sa mga traidor sa rebolusyon sanday Nocnoc Francisco kag Jerwin Gatillas.

Ang pagkapatay ni Warlita Jimenez nagapatimaan lang nga wala sang kredibilidad kag kakayahan sang reaksyonaryong sistema kag estado sa paghatag sang matuod nga hustisya sa mga biktima sang kalakasan kag pagpanglapas sa tawhanon nga kinamatarung sa mismo mga elemento kag opisyal sang reaksyonaryong armadong pwersa.

Pareho nga mga aktibo kag maisog nga lider mangunguma ang mag-asawa nga Jimenez nga nagakigbato sa interes sa mga benepisyaryo nga mangunguma sa ila lugar para ma-angkon ang duta nga gintalana na sang layi para sa ila apang maganit nga ginahatag sa ila sang pamilyang Sola kahimbon ang ahensya sang Department of Agrarian Reform (DAR).

Bangud sini, ginapatu-patoan ang mag-asawa nga mga katapo sang New People’s Army (NPA). Kon indi sa ila nga determinasyon kag kaisog sa pakig atubang sa kaaway nga sahi nga agalon mayduta nga pamilyang Sola, indi nila amat amat ma-angkon ang duta nga para sa ila.

Nagapamatuod lang ini nga ang reaksyonaryong sistema sang hustisya wala nagadampig sa interes sang pumuluyo kag nagapangapin ini sa mga pagpanghimulos kag pagpamigos sang nagahari nga sahi kag estado.

Wala sa rebolusyonaryo nga kultura sang NPA kag rebolusyonaryong kahublagan ang kultura sang “ubusay lahi” ilabina ang akto sang henosidyo kag kultura sang impunidad. Iya ini nga kultura sang reaksyonaryong sahi kag estado upod ila mga idu buang nga armadong pwersa nga naghalin man sa dekadente kag garuk nga ideolohiya sang ila mga imperyalistang amo.

Matuod kag makatarunganon nga rebolusyonaryo nga hustisya ang ginapatuman sang rebolusyonaryong gobyerno kag ang tanan nga ginsilotan nag-agi ini sa husto kag nagakaigo nga proseso sang hustisya, nagasandig sa internasyunal nga makitawhanon nga layi kag pagrespeto sa tawhanon nga kinamatarung.

Gani, nagapanindugan ang ini nga rebolusyonaryo nga sistema sang hustisya sa interes sang malapad nga pumuluyo nga ginpigos kag ginhimuslan. Kabangdanan nga indi gid mapunggan sang reaksyonaryong estado ang pagbaskug pa sa pagtubod sang suporta sang malapad nga masa para sa rebolusyonaryo nga kahublagan.