Gidayeg sa mga rebolusyonaryong mag-uuma sa Northern Negros ilawom sa Pambansang Katipunan ng mga Magbubukid (PKM) ang gihimong mapangahas nga aksyong haras sa usa ka gamay nga yunit sa Roselyn Jean Pelle Command-New People’s Army (RJPC-NPA) batok sa nag-operasyon nga platun sa Charlie Company sa 79th IB sa Purok Singko, Barangay Gawahon, syudad sa Victorias niadtong Septyembre 14 sa gabii.

Matud pa ni Guillermo Mangugubat, tigpamaba sa PKM-Northern Negros, ang aksyong haras sa RJPC nagpataas sa ilang moral ug determinasyon nga militanteng makigbisog para sa tinuod nga reporma sa yuta pinaagi sa pursigido nga pagpasulong sa rebolusyong agraryo.

Dugang ni Manggubat, ang 79th IB nagsilbi nga armadong goons ug idu-ido sa mga haciendero, dakong agalong yutaan ug komprador burges aron imintina ang ilang pyudal ug malapyudal nga pagpahimulos sa masang mag-uuma nga maoy tuburan sa ilang gihugakom nga manggad.

Sa partikular, tumong sa presensya sa 79th IB sa Barangay Gawahon mao ang pagsumpo sa lehitimong pakigbisog sa mga mag-uuma para makaangkon sa yutang panginabuhian ug pagguba sa panaghiusa sa katawhan pinaagi sa pasismo ug terorismo sa estado aron gawasnon nga mapatuman ang mga makadaut nga proyekto sa mga lokal nga nagharing hut-ong ug langyaw’ng kapitalista.

Nanawagan si Manggubat sa tanang mag-uuma ug katawhan nga dili mahadlok ug makigbisog para sa yuta, katungod ug kagawasan. Suportahan ug mosalmot sa NPA, ang tinuod nga sundalo sa katawhan. Isulong ang gubat sa katawhan para sa demokrasya ug kagawasan!