Ang hukum sa Manila Regional Trial Court nga gipagawas niadtong Setyembre 21 nagbasura sa kasong “teroristang proskripsyon” (o pagdumili sa basehang terorista) batok sa Partido Komunista ng Pilipinas (PKP) ug Bagong Hukbong Bayan (BHB). Ang Gubyerno sa Republika sa Pilipinas (GRP), pinaagi Department of Justice niini, napakyas sa pagpamatuod sa ilang akusasyon sa terorismo batok sa PKP ug BHB. Sa 135-panid nga desisyon niini, ang korte miingon nga ang PKP ug BHB mas tukmang ikategorya isip mga rebelde, o mahimo natong idugang, mga rebelde nga adunay kawsa—ang nasudnong demokratikong kawsa.

Ang PKP, nga mirepresentar sa hut-ong mamumuo, ug ang BHB, usa ka hukbo nga gipundar sa han-ay sa mga mag-uuma, mirepresentar sa pinakadaghan, ug labing dinaugdaug ug pinahimuslang mga hut-ong sa Pilipinas. Kadtong nagduso sa pag-akusar sa PKP ug BHB isip terorista mao kadtong nagtinguha sa pagtabon o pagsupak sa ilang mga rebolusyonaryong pulitikanhong pangandoy.

Kinahanglang hingpit natong ibutyag ang maong mga “tigbansag og terorista” kung unsa gyud sila: mga pasista ug tighulhog og gyera, ug tigpanalipud sa madaugdaugon, mapahimuslanon, dunot ug korap nga kasamtangang kahimtang. Sila mga imperyalistang ahente ug mga alipures sa nagharing hut-ong. Nagsaba-saba sila kabahin sa “terorismo” aron tabunan ang patriyotiko ug demokratikong singgit sa katawhang Pilipino, nga makita sa konstitusyon ug programa sa aksyon sa PKP.

Misangpot sila sa terrorist-branding (teroristang pagtatak) tungod kay supak sila sa pangayo alang sa tinuod nga reporma sa yuta ug nasudnong industriyalisasyon. Supak sila sa panawagan nga patas-an ang suhulan sa mga mamumuo tungod kay sukwahi kini sa palisiya sa pagdani sa langyawng imbestor. Gipaboran nila ang pribatisasyon ug gitugutan ang mga kapitalistang hakog sa ganansya sa pagpadagan sa mga ospital, eskwelahan, serbisyo sa tubig, kuryente, telekomunikasyon, bisan sa mga dalan ug tulay ug uban pang pampublikong imprastruktura.

Supak sila nga gahinan og dugang badyet alang libreng edukasyon ug serbisyong panglawas sa publiko ug, nagtinguha na hinoon og dugang pondo alang sa mga mausikon ug engrandeng mga proyekto sa imprastraktura diin ang mga burukrata, sama sa kadaghanan kanila, makapangwarta. Maunungon sila sa neoliberal nga palisiya nga dikta sa IMF ug World Bank, lakip na ang liberalisasyon sa importasyon nga nagresulta sa pagbaha sa mga imported nga palaliton sa nasud sa kaalautan sa mga lokal nga pabrika ug produksyon sa agrikultura.

Supak sila sa dugay nang demanda nga wagtangon ang tanang dili patas nga mga tratado militar sa US ug nagdayon sa pagduso sa dugang ayudang militar sa US—jetfighters, helicopter gunship, bomba, howitzer, pusil ug bala—ngadto sa Armed Forces of the Philippines (AFP). Wala usab nila gidepensahan ang teritoryo ug kadagatan sa nasud batok sa mga langyawng mananakop nga tropa, Chinese man o Amerikano. Daghan sa mga terrorist brander sa Pilipinas ang lunod-patay nga maki-US.

Ang mga terrorist brander mao ang mga militaristang gustong ibutang ang nasud ilalum sa paghari ug kamangtas sa militar ug kapulisan. Gusto nilang isurender sa katawhan ang tanan nilang mga katungod—gikan sa ilang katungod sa gawasnong pagpahayag ug sa ilang katungod sa pag-organisa, ngadto sa ilang katungod sa pagka-anonimos (dili pagpaila sa kaugalingon) ug pribasiya. Gusto nilang mas daghang salapi ang mapadulong sa militar ug pulisya ug magtukod og usa ka estado sa pagsurbeylans. Para kanila, mao kini sumbanan sa kondisyon sa paglungtad sa “kalinaw ug kahusay”.

Supak sila sa negosasyong kalinaw tali sa gubyerno sa Pilipinas ug sa National Democratic Front of the Philippines (NDFP). Dili nila gustong ilatag sa lamesa ang mga batakang sosyo-ekonomikanhong problema ug tubagon kini pabor sa hut-ong mamumuo ug mag-uuma. Niadtong 2017, sa pag-aghat sa US, gideklara sa tiranong Duterte ang CPP ug NPA isip mga terorista aron tapuson ang negosasyon sa kalinaw, dihang gikatakdang mopirma na unta ang mga panel sa kalinaw sa usa ka kasabutan mahitungod sa reporma sa yuta ug uban pang importanteng reporma sa palisiya sa ekonomiya–ang unod sa negosasyon sa kalinaw. Human niadto, gilunsad ni Duterte ang kampanya sa pagpatay nga mipatay sa dili mominus 15 ka konsultant sa kalinaw sa NDFP.

Ang desisyon sa Manila RTC mibaliktad sa batakang pasangil sa kontra-katawhan ug brutal nga gubat kontra-insurhensiya nga gilunsad sa AFP. Giyagyag niini ang “gubat batok sa terorismo” sa AFP isip usa ka dakung bakak. Gibutyag niini ang kamatuoran nga ang gubat kontra-insurhensiya sa AFP walay lain kundili usa ka gubat sa pagpanumpo ug pagpuypuy/pasipikasyon, usa ka gubat aron sumpuon ang lain-laing porma sa pagsukol sa katawhan sa imperyalismo, pyudalismo ug burukrata-kapitalismo.

Nakighiusa ang PKP ug BHB sa tanang patriyotiko ug demokrata sa Pilipinas nga nagtinguhang kab-oton ang pangandoy sa katawhan alang sa tinuod nga nasudnong kagawasan ug demokrasya. Dili tanang mga patriyotiko ug demokrata mahimong mouyon sa panginahanglan sa armadong pakigbisog, o dili pa andam nga mosalmot sa armadong pagsukol, apan dili ikalimod ang makasaysayanong kamatuoran nga ang armadong pakigbisog nga gilunsad sa BHB maoy usa sa pinakaimportanteng hinagiban sa katawhang Pilipino sa ilang pagsukol sa diktaduryang US-Marcos ug sa 14-ka-tuig nga balaod militar; ug nga karon, ang armadong pakigbisog nagpabiling usa ka makatarunganon ug gikinahanglang porma sa pagsukol atubangan sa terorismo sa estado ug pagharing militar, ilabina sa kabanikanhan.

Ang BHB padayong nagsilbing yaweng hinagiban sa lapad nga masa, ilabina sa mga mag-uuma, aron depensahan ang ilang mga katungod ug kinabuhi batok sa mga pag-abuso ug kabangis sa mga pasistang demonyo sa AFP. Sa pagkatinuod, alang sa libuang Pilipino, ang pagsalmot sa BHB mao ang bugtong pamaagi aron depensahan ang ilang kaugalingon, ang ilang panginabuhian, ang kinaiyahan ug ang kinaiyanhong bahandi.

Sa paglunsad og armadong pakigbisog, ang BHB nagtamod sa pinakataas nga sumbanan sa pagpanalipud sa katungod ug kaayuhan sa mga sibilyan. Nagsunod kini sa istriktong kodigo sa disiplina, ug nagsunod sa mga lagda sa internasyunal nga makitawhanong balaod. Kini usa ka batakang prinsipyo sa BHB nga naggikan sa kamatuoran nga ang mga Pulang manggugubat sa BHB naggikan mismo sa katawhan. Dili molambo ang BHB kung walay suporta sa katawhan. Napailalum ang BHB sa pagsaway sa masa ug pagpatuman sa mapahiubsanong pagsaway sa kaugalingon sa ilang atubangan. Gitugutan niini ang BHB ug katawhan nga lig-ong maghiusa ug magpadaghan.

Nag-atubang ang katawhang Pilipino sa nagkagrabeng kahimtang ubos sa himalatyong semikolonyal ug semipyudal nga sistema. Nag-antus sila sa kontra-katawhan ug kontra-kabus nga mga palisiya sa rehimeng Marcos II nga desidido sa pagsiguro ug pagpalapad sa ilang bahandi ug pagpatunhay sa pulitikanhong dinastiya niini. Si Marcos Jr ang representante sa nagharing pundok nga walay pagtagad sa pag-antus sa naghagong katawhan.

Atubangan sa nagkagrabeng krisis, among giawhag ang katawhang Pilipino, ilabina ang mga mamumuo ug mag-uuma, ingonman ang mga kabatan-onan ug estudyante, magtutudlo, katawhan sa akademya, abogado, peryodista ug midya, doktor, nars ug uban pang propesyunal, nga maglunsad og rebolusyonaryong pakigbisog aron depensahan ang ilang katungod ug mosukol alang sa ilang mga pangandoy.

Among giawhag ang tanan nga mahimong organisado, mosalmot sa nasudnon demokratikong pakigbisog ug moapil sa nagkalain-laing tago nga organisasyon nga kaalyado sa National Democratic Front of the Philippines. Among giawhag ang mga walay kabilinggan nga mosampa sa Bagong Hukbong Bayan. Nanawagan kami sa tanang Pilipino nga suportahan ang BHB sa paglunsad niini sa makatarunganong armadong rebolusyon alang sa nasudnon ug katilingbanong kalingkawasan.