Matapos ang pagpangransak sang 94th IB sa kabalayan sang mga mangunguma kag pagpangsulahug sa mga kalatian sa Barangay Carabalan, Himamaylan City, Negros Occidental, matalupangdan ang pagdamo sa presensya sang nasambit nga militar sa katambi nga baryo sini sa Barangay Buenavista sa amo gihapon nga syudad.

Sang Oktubre 13, nag-abot ang 14 ka bilog nga mga tropa militar sa Sityo Tigbao, Barangay Buenavista. May ara man ini katimbang nga duha ka kolum sa Sityo Asaran kag sa Sityo Bilo, sa amo gihapon nga barangay.

Sulod sang ila operasyon kombat, nareport ang pag-abdak sa isa ka mangunguma nga nakilal-an nga si Magong Lozano, singkwentahon ang edad kag may ara pamilya. Natabo ang insidente samtang ara siya sa iya balay sa Sityo Tigbao. Pila ka adlaw pa ang nag-agi antes pa nabal-an sang pamilya nga gindala sang berdugong militar sa 94th IB si Lozano.

Sa dugang nga pagpangusisa, nadiskubrehan nga ara man subong si Lozano sa Sityo Malinong, Barangay Buenavista, upod sang mga naga-operasyon nga mga militar. Pilit man siya nga ginhimo nga giya sa pagsulod sa mga kalatian sa lugar.

Lubos nga ginkundenar sang Romeo Nanta Command-New People’s Army (RNC-NPA) ang nagalala nga terorismo sang estado nga mabatyagan sa banwa sang Himamaylan City. Ang mga hinimuan sang 94th IB, maathag nga nagalapas sa Geneva Conventions kag International Humanitarian Law, nga nagapaseguro sa makatawhanong pagtratar sa mga sibilyan nga indi man direkta nga imbolbado sang gyera sibil sa subong.

Dugang diri, ginapanawagan man sang yunit nga indi magkahadlok ang pumuluyo nga magbato indi lang para sa tawhanon nga kinamatarung, kundi lakip na ang paggiit sang matuod nga reporma sa duta kag pungsodnon nga industriyalisasyon nga magasabat sa nangunang problema sang mga Pilipino.