Gin-istraping sang mga katapo sang #DiMasaligan79IB ang isa ka mangunguma nga nagpahuway sa isa ka puluy-an sa proper sang Barangay Minautok, Calatrava, Negros Occidental kagaina, alas 8:30 sang aga, Abril 6.

Wala sang yunit sang Roselyn Jean Pelle Command-New People’s Army (RJPC-NPA) nga naghulag sa lugar sa sina nga panahon. Taliwas sa ginpaguwa sang nasambit nga militar sa lugar nga may engkwentro sa tunga sang RJPC-NPA kag sang #DiMasaligan79th IB.

Tubtob subong, wala pa nahibal-an ang kahimtangan sang biktima bangud gindumilian sang nasambit nga militar ang mga pumuluyo nga makasulod sa erya sa nahitaboan.

Bangud sa desperasyon sang #DiMasaligan79IB, indi na katingalahan nga maghimo ini sang peke nga engkwentro agud mahinabunan ang ila kapaslawan sa pagwasak sang rebolusyonaryong kahublagan ilabi na ang armadong paghimakas sa Northern Negros.

Kon madumduman, masobra sa 20 ka aksyon militar ang natigayon sang RJPC-NPA halin sang nagligad tuig bisan pa sa ginapasingki nga focused military operations sang nasambit nga militar.