Isa ka mangunguma ang patay kag duha ka iban pa ang pilason sa padayon nga pagpanalasa sang berdugong militar sa kaumhan nga sakup sang sentral Panay.

Kabutigan ang ginpagwa nga pahayag sa midya sang mga militar nga may natabu nga engkwentro sadtong Pebrero 26 sa Barangay Minan, Tapaz, Capiz sa tunga sang tropa sang militar kag yunit sang NPA. Waay sang yunit ang NPA nga gahulag sa nasambit nga erya sa amo nga panahon. Sa pagkamatuod ang natabu, halin sa pagpangayam ang tatlo ka mangunguma kag nagapahuway-huway sa ila ulumhan sang hungod sila nga ginpangtiro sang mga berdugong militar.

Napatay si Tito Agudes, samtang pilason naman ang iya hinablos kag ang isa pa gid nila ka upod. Lunsay mga pumuluyo sang Sitio Taroytoy Barangay Manica, Libacao, Aklan ang tatlo kag nagapanguma sa lindero sang Aklan kag Capiz mayormente sa erya nga sakup na sang Barangay Minan, Tapaz, Capiz.

Agud hingabunan ang ila krimen batuk sa mga pumuluyo, ginpagwa sang militar nga mga katapo sang NPA kag gintamnan sang mga peke nga ebidensya ang tatlo ka biktima sa pihak sang mga pahayag sang mga pumuluyo kag mga opisyal sang mga nasambitan nga barangay nga mga rehistrado nga residente sang barangay ang tatlo. Si Tito Agudes miyembro sang Barangay Tanod sa Barangay Manica. Sang magreklamo ang pamilya upod sa mga opisyal sang barangay ginrason sang militar nga kuno mga tagasuporta sang NPA ang tatlo amo nga gintiro nila.

Padayon ang focused military operation nga ginalunsar sang militar sa idalom sang 3rd ID Philippine Army sa mga kabaryuhanan nga sakop sang Sentral Panay. Bangud sini apektado ang malinong nga pagpangabuhi sang mga tumandok nga mangunguma. Limitado na ang ila panahon sa pag-ubra sa mga kaingin kag indi na makapanglugayawon sa mga katalunan agud magpangayam bangud sa kahadlok nga masal-an sang mga militar nga mga katapo sang NPA.

Nagapanawagan ang NPA sa Sentral Panay sa tanan nga pumuluyo, indibidwal, organisasyon, mga taong simbahan, LGU, kag mga tagpangapin sang tawhanon nga kinamatarung nga imbestigahan ang natabu kag buligan ang natungdan nga mga pamilya sa pagpangayo sang hustisya kag sukton ang militar sang danyos sa ila nga ginhimo nga kalakasan.