Iresponsable ang mga palayag ni Mayor Irene Montilla sang banwa sang Isabela, Negros Occidental kaangot sa nadula nga 2.6 milyones nga kwarta kag 3.8 milyones nga balor sang tseke sang banwa nga gindala sang tresyurera sang banwa nga si Neneth Escarda sa ila puluy-an sa Bacolod. Daw wiper ang ulo ni Montilla nga nagapanginwala sang ginhimo ni Escarda kag pagtugyan na lang sang imbestigasyon sa probinsya kaangot sa sini nga insidente kag iskandalo. Negligence of duty, misconduct and unbecoming of a public official ang aktwasyon ni Montilla bilang alkalde sang nasambit nga banwa.

Nadumduman nga daw ginapadayaw pa ni Montilla upod sa iya mga alipures nga nagdako ang pundo sang banwa gikan sa pagpatuman sang functual nga pagbuhis sa mga ordinaryo nga pumuluyo, negosyante kag small planters sa iya termino bilang alkalde. Ang matuod nga nagareklamo kag nag-antus ang pumuluyo sang Isabela sa mataas nga buhisan sa banwa ilabe na ang mga mangunguma, small planters, mga magagmay nga negosyante kag iban pa nga mga indibidwal sa pihak sang covid 19 pandemic, grabe nga implasyon bangud sang grabe nga pagtimbuok sang mga balaklon resulta sang wala-untat nga pagsaka sang presyo sang petrolyo. Dugang pa nga si Montilla na ang nagpungko bilang alkalde sa Isabela, mas nagdamo ang nagluntad nga mga anomaliya kaangay sang mga masunod:

1. Pagkasunog sang Mayor’s Office rason nga nadula ang mga dokumento publiko ilabe na ang records sa pinansya partikular na ang mga liquidations sang mga natapos kag wala-natapos nga implementasyon sang mga proyekto sang banwa.

2. Pagpamilit sang Montilla clique sa Sanggunian Panlungsod sang Isabela sa madasig nga desisyon sang legislative body agud i-release ang pundo bisan pa sang kakulangan sa proseso kag rekisitos para ipatuman ang proyekto.

3. Ang kontrobersiya sang Barangay Development Program sang NTF-Elcac ilabe na ang utay-utay nga pagrelease sang 20 milyones pesos nga budget sa mga ginkabig nga 8 “cleared-barangays”sang militar. Wala man sang klaro nga liquidations sa project implementation nga ginareklamo sang mga kapitanes kag opisyales sa barangay. Imbes nga “whole of the nation approach” nga ginatikal ni Montilla upod sa Armed Forces of the Philippines kag NTF-Elcac, makahuluya kay nahimo nga “Plunder the whole nation approach.” Nagakahulugan nga ang BDP nahimo nga gatasan sang korapsyon sang mga matag-as nga opisyal sang AFP, PNP kag local executives head.

Ang ini nga mga anomaliya nga gindayday idalum sa termino ni Mayor Irene Montilla sa banwa sang Isabela ang pipila lang sa mga anomaliya kag kontrobersiya sang banwa.

Bisan pa man nga may kakulangan kag salabton si Neneth Escarda bilang tresyurera sa sini nga eskandalo sa pundo sang banwa, sa gihapon command responsibility ni Mayor Irene Montilla bilang alkalde ang ini nga hambalanon bangud at stake diri ang buhis o’ kwarta sang mga pumuluyo kag kaban sang banwa nga dapat tipigan sang alkalde kag iban pa nga ahensya kag opisina sang LGU kaangot sa paghalong sang propiedad ilabe na ang pinansya sang banwa. Naga-imply, nga ginahimo nga “tapalan” ni Montilla si Escarda sa sini nga eskandalo sa kaban sang pumuluyo sa banwa sang Isabela.

Ginahangyo gid sang LPC-NPA nga dapat ipaggwa ni Neneth Escarda ang kamatuoran sa likod sang sini nga eskandalo nga indi makadiskaril sa madasig nga imbestigasyon. Nakataya diri ang dignidad sang banwa kag buhis sang pumuluyo. Dampigan ang banwa sang Isabela kag bug-os nga Isabelenyo batok sa korap kag inutil nga pipila lang sa burukrasya sang banwa.

Ginahangkat man sang LPC ang mga Brgy Captains kag Brgy Officials sang Isabela nga magpangita sang hustisya para sa inyo mga constituents. Kamo ang ila ginpili kag may mandato sa pagtingog para sa kawsa sang pumuluyo. Mag-isa para sa kamatuoran kag isikway ang mga kabutigan kag pagpatalang.

Ang Leonardo Panaligan Command-New People’s Army ang nagapakig-isa sa pagpangita sang hustisya para sa pumuluyo sang banwa sang Isabela. Magpangita sang pamaagi sa pagtukib sang kamatuoran kag ang sa likod sini tanan. Handa gid ang NPA sa pagsilot sa mga natungdan matapos nga mapamatud-an gikan sa maid-id nga imbestigasyon, proseso kag pagbista sang Rebolusyonaryong Korte sang Pumuluyo.