Mabaskog nga ginapakamalaut kag ginakondinar sang Mt. Cansermon Command-New People’s Army (MCC-NPA) ang mapintas kag brutal nga pagpatay sang mga berdugo nga tropa sang 94th Infantry Battalion sang Philippine Army (IBPA) kay Junjun Encancion, 29 ang edad, kag ang iligal nga pag-aresto kay Robnie Ariola, 20 anyos, Junjun Casilo, 24 anyos, kag Jonalyn Agaton, 16 anyos, lunsay mga residente sang Sityo Bugo, Brgy. Buenavista, Himamaylan City, Negros Occidental, pasado alas 3:00 sa hapon sang Mayo 26, 2021.

“Wala sang engkwentro nga natabo sa tunga sang 94th IBPA kag NPA kag wala man sang yunit sang NPA sa ina lugar sini nga panahon. Ang matuod nagsabwag sang kalakasan ang berdugo nga 94th IBPA sa mga pumuluyo sa nasambit nga lugar,” suno kay Dionesio Magbuelas, tagpamaba sang MCC-NPA.

Dugang pa ni Magbuelas, ang matuod nga natabo, pasado alas 3:00 sang hapon, samtang nagapahuway-huway kag naga-inom si Junjun Encancion upod sanday Robnie Ariola, Gerard Ariola kag Junjun Casilo gindakop sang nasambit nga tropa sang militar si Encancion kag gindala sa balay ni Terry Dionaldo sa proper sang Brgy. Bugo. Didto siya iligal nga gin-interogar kag pwersa nga ginapasugid. Apang bangud wala ini sang may masugid, mapintas nga ginlampusan sa ulo sang uhaw sa dugo nga mga elemento sang Armed Forces of the Philippines (AFP) ang nasambit nga biktima gamit ang dos por dos nga kahoy tunaan sa pagkawasak sang iya ulo kag ginpaarakan sang armas ang iya nga lawas. Gintanum lamang sang AFP ang mga nasambit nga armas nga kuno narekober nila sa mga biktima.

Suno pa ni Magbuelas sandig sa imbistigasyon ginhulat pa sang 94th IBPA nga magbaho ang bangkay ni Encancion antis ini gindala sa banwa. Dugang pa, ila ginsunog ang balay ni Gerard Ariola kag iligal nga gin-aresto sa patu-pato nga kaso sanday Robnie Ariola, Junjun Casilo kag Jonalyn Agaton nga yara subong nahunong sa Himamaylan Police Station, samtang ginpagwa si Agaton bangud luwas sa ini menor-de-edad wala pa gid sang ebidensya.

Kaangay man ini nga kondukta sa natabo nga pagpatay sang 94th IBPA kay Padoy Lozano nga gin-abduct kag ginpatay sa proper sang Brgy. Mahalang, Himamaylan City, pasado alas 11:00 sang gab-i sang Mayo 13, 2021. Sang Mayo 14, ginlusob man sang nasambit nga tropa ang tatlo ka balay sang pamilya Hilado samtang mahamuok nga nagakatulog sa Sityo Alulong, Brgy. Buenavista sa pareho gihapon nga syudad.

“Ang pagsabwag sang kakugmat sang 94th IBPA batuk sa pumuluyo sa syudad sang Himamaylan ang mahigko nga taktika sini sa pagpatuman sang pahayag ni Duterte nga “kill them all” batok sa CPP-NPA. Makahuluya nga tikang sang mga talawan nga tropa sang AFP kay ang mga ginapamatay lunsay mga mangunguma kag inosenteng sibilyan,” suno ni Magbuelas.

Nagapanawagan ang MCC-NPA sa pumuluyo sang South Central Negros nga ibuyagyag kag pamatukan ang mga paglapas sa tawhanon nga kinamatarung kag iban pa nga mga kalakasan batuk sa pumuluyo nga ginakomiter sang 94th IBPA nga ginapamunuan ni Lt. Col. Angelo Guzman. Subongman sa gobyerno lokal sang Himamaylan kag iban pa nga institusyon sa tawhanon nga kinamatarung nga maglunsar sang maid-id nga imbistigasyon kag pasabton ang 94th IBPA sa ila madinuguon kag barbariko nga rekord sang terorismo.

“Ihatag sang NPA ang hustisya sa mga pumuluyo sang Himamaylan paagi sa paglunsar sang madinalag-on nga mga taktikal nga opensiba batuk sa mga pasistang AFP/PNP,” pagtakop ni Magbuelas.