Waray katungod hi Fawa Batula nga magyakan ha ngaran han mga residente han Palapag, Northern Samar labina nga ha nakalabay nga mga tuig, nagin aktibo hiya nga papet han National Task Force-Elcac ngan 8th Infantry Division ha pagsabrag han pasista nga terorismo han estado ha iya bungto.

Ngani, ginsusuka hiya han masa nga parag-uma tungod ha todo-buylo niya nga pagsuporta ha mga operasyon nga RCSP ngan kampanya kontra-insurhensiya. Ginpapatawag niya ha iya upisina an mga ordinaryo nga parag-uma agud piriton nga “magpa-clear” bisan kun waray naman ini sala. Ginpabay-an niya nga i-hostage han desperado nga militar an pamilya han mga target nira pasurenderon, kaupod an mga menor de edad. Regular niya nga ginpapatawag an mga asawa ngan anak han mga Pula nga mangaraway agud kumbinsihon nga pasurenderon an ira kaurupdan.

Tikang pa hadton 2021 napakabuta-bungol hi Batula ha tikahilaba nga listahan han pangaabuso militar ha Palapag. Waray hiya ginhimo para kanda Oscar Alastoy, Joel Recare ngan Ryan Arnesto nga ginpatay han mga pasista nga tropa. Ginpabay-an la niya ini nga mag-imponer han mga hamlet o “lockdown” nga nagdidiri ha mga parag-uma nga tumukad. Malipayon niya nga ginkakarawat an mga sundalo nga naglilibot ha mga eskoylahan para magsaywar ha kabatan-unan, ngan ha mga baryo para magpasurender han mga sibilyan.

May usa nga insidente nga gin-istraping ngan gindakop han mga pasista nga tropa an tulo nga menor de edad ha tahap nga mga “koryer” hira han BHB. Gindara ang mga biktima ha kampo militar, pulisya nga ha Balay Darangpan nga usa nga “half-way house” para ha mga surenderi. Han mabuksas ini, nagpasangil hi Batula nga waray kuno sugad nga pasilidad an lokal nga gubyerno agud magin makarukarawat an pagtalapas.

Ginsusuportahan niya an kampanya kontra-insurhensiya agud mapalipay an mga amo niya nga sundalo samtang ginpapadako an nabubursa niya nga kurakot. Ginhimo niya nga “photo ops” an pondo han E-CLIP diin an ginsesering nga ₱40,000 nga nahingangadto ha “benepisyaryo,” ₱4,000 la ha aktwal samtang an ₱20,000 nagigin ₱2,000. Ikaduha an Palapag ha bug-os nga rehiyon nga may pinakadamo nga baryo nga benepisyaryo han SBDP han NTF-Elcac nga nagbabalor hin milyun-milyon. Ini nga pondo pahalipay kan Batula komo lunod-patay nga tagasunod ha kontra-insurhensya nga kampanya ngan surok liwat han korapsyon.

Diri ginrerepresentar ni Batula an interes namon nga mga parag-uma. Anuman nga pagdepensa ha 8th ID an iya himuon, mahugot pa gihapon nga ginkukundenar han mga parag-uma an presensya nira ha kabaryuhan. Ginkakangalsan namon hira. Waray hira kaupayan nga dara ha amon. Kun may sundalo ha amon umhanan, ginlilikyan namon hira ngan nahahadlok kami para ha amon katalwasan. Diri sugad kun aada an BHB, nga kampante kami nga makaupod ngan segurado kami nga ipapakig-away an among interes.