Bakak ang ginapagpar sa Armed Forces of the Philippines (AFP) ug Philippine National Police (PNP) nga nagmalinawon kuno ang gipahigayon nga nasyonal ug lokal nga eleksyon dinhi sa probinsya sa Surigao del Sur. Gilimod nila nga wala nagtunhay ang mga armadong goons sa mga Partido pulitikal nga nanghulga ug nanghadlok sa mga sibilyan ug nagapanggubot sa eleksyon. Gilimod nila ang kaylap nga pinalitay og boto. Ug gilimod usab nila nga lakip sila sa mga nagpaluyo ug nagkunsintir sa mga dautang binuhatan sa mga pulitiko.

Ilang gusto ipagawas sa publiko nga ang New Peoples Army mao kuno ang naghatod og kagubot karong eleksyon 2022. Kabahin sa ilang pagmugna og mga drama aron ipakita sa kadaghanan nga limpyo ang ilang rekord ug sila ang nahimong biktima sa maong mga armadong pagpangatake.

Apan sa aktwal nga piniliay subay sa taho sa mga masa sa erya nalista ang mga pipila ka insidenteng may kalambigitan sa eleksyon dinhi sa Surigao del Sur. Wala gyud maski usa niini ka panghitabo nga report gikan sa pulis. Ug wala gyud kini napasibaw sa midya.

Ania ang mga mosunod nga detalye:

Sa mga barangay sa Carmen ug Cantillan adunay mga tinaptapang itom nga sakyanang magsulod-sulod niini nga mga barangay kaniadtong Mayo 7, 2022. Gikaintapang mga goons kini sa mga politiko nga nagmonitor sa gidagan sa eleksyon 2022. Naghatod kini og kahadlok ngadto sa mga botante.

Carmen – gidis-armahan ang mga bodyguard ug goons ni Caldo, nidagan pagkakonsehal sa lungsod sa Carmen sa, sa mga goons ug bodyguard ni Jane Plaza, kakontra Partido ni Caldo, kaniadtong Mayo 6, 2022. Ang mga goons ni Plaza myembro sa paramilitar nga grupo ni Calpit, nailang bangis nga grupong adunay rekord sa pagmasaker sa mga Lumad Manobo.

Ang mga nadis-armang armas sa paramilitar nga grupong Calpit giturn-over ngadto sa 36th IBPA. Nagreklamo niini si Caldo sa kapulisan. Imbes nga kasohan si Plaza gidugangan na hinuon og escort si Caldo sa mga kapulisan. Walay report sa midya niini.

Barangay Hinapuyan, atol sa binotaray gisaywar ang mga botante sa mga armadong goons ug body guard ni Caldo. Ginatan-aw ang ilang mga balota kun kinsa ang ilang botaran. Kun lahi nga kandidato ang mabutang sa balota bahadan kini sila nga dili na mabuntagan.

Lanuza – sa barangay Agsam, gipangsaka ang mga kabalayan sa mga sibilyan ni Marlo Hontanosa, usa ka armadong goons kaniadtong Mayo 9, 2022. Gipanghulga ang mga tawo nga dili pabotaran ang kontra sa pulitika sa iyang amo.

Barangay Sibajay gipaarakan sa mga wala mailhing armadong tawo, ang nakaparking kilid sa national highway nga sakyanan ni Ray Shachem “King-King” Azarcon, nikandidatong Mayor sa Lanuza, kaniadtong Mayo 9, 2022 sa may alas 6:00 sa buntag. Anaa sa sulod sa sakyanan si Azarcon kuyog ang iyang mga body guard nga armado sa tag-as nga kalibreng armas samtang nahitabo ang pagpamusil. Isa sa mga bodyguard niya ang naigo nga nailang si Alfonso Mira Uriarte alyas “Tayor” residents sa P-3 brgy. Gamuton, Lanuza, SDS

Ang mga armadong goons nga namusil Kang Azarcon wala maila kang kinsang pulitiko nag-alagad. Gipasumangil kini nga insidente ngadto sa NPA.

Madrid – sa barangay Unyon, nagpabuto-buto og pusil ang Partido ni Pichay nga team Gugma ngadto sa mga tigsuporta sa Partido ni Pimentel nga team Hugpong kaniadtong Mayo 8, 2022. Gihimo kining pagpaboto-boto aron dili makalusot ang gipanghatag nga kwarta sa team Hugpong ngadto sa mga tawo.

Bayabas – Barangay Amag, nagkapinusilay ang duha ka grupo sa mga armadong goons ug bodyguard sa duha ka magkaatbang nga nidagan og pagkamayor nga silang Boy Montero (team gugma) ug Puli Lozada, incumbent vice mayor (team Hugpong) kaniadtong Mayo 8, 2022 sa may alas 10 sa gabie. Usa ang patay nga goons gikan sa team gugma.

Matod sa nakasaksi, gisulong sa duha ka van sa grupo sa team gugma ang hideout sa team Hugpong nga kaniadtong higayona nag-istambay sa gawas. Giistraping kini sila sa taga team gugma maong nibalos ang pikas grupo sa hugpong. Diha-diha napatay ang usa ka goons nga nanulong. Walay blotter nga gihimo.

Kini nga mga panghitabo nagpamatuod lamang sa kahugaw sa eleksyon sa Pilipinas. Wala bisan kanus-a man naglaom ang rebolusyonaryong kalihukan nga masulbad ang problema sa nasud pinaagi sa burges nga eleksyon. Bisan kinsa pa ang makalingkod sa gahom susama ra gihapon ang pamalaod nga ipadagan niini. Nag-alagad ra gihapon kini sa interes sa amo niining Imperyalista, Burgesya Komprador ug Agalong Yutaan.