Desperado nga pambirikis ha kamatuoran an pahayag han 19th Infantry Battalion nga nagtalapas kuno an Bagong Hukbong Bayan (BHB) ha deklarasyon han ukoy-bubto han Partido. An armado nga aksyon han BHB ha Barangay Poponton, Las Navas hadton Disyembre 15 klaro nga gawas han panahon han gindeklara nga ukoy-bubto.

Komo pagkaklaro, malastar la an unilateral nga ukoy-bubto tikang Disyembre 25, alas-12 han kaagahon, tubtub Disyembre 26, alas-11:59 han gab-i; ngan ha Disyembre 31, alas-12 han kaagahon, tubtub Enero 1, 2026, alas-11:59 han gab-i.

Hini nga mga adlaw, an mga yunit han BHB aada ha aktibo nga depensa ngan igpapabilin an hitaas nga alerto kontra ha mga patraydor nga atake han AFP-PNP, nga padayon nga naghihimo hin operasyon kombat ha damo nga baryo ha butnga han grabe nga krisis ngan pagkukuri han hiluag nga masa. Kinahanglan himuon han BHB an tanan agud pakyason ini nga mga atake nga tuyo nga igsabotahe an selebrasyon han BHB ngan masa ha tiarabot nga anibersaryo han Partido ha Disyembre 26.

Ha panahon gawas han ukoy-bubto, gintutugutan an BHB nga maghimo hin mga taktikal nga opensiba kontra ha mga lehitimo nga target, agud kab-uton an hustisya ha ngaran han masa nga ginpapakurian han mga berdugo nga armado nga pwersa han estado ngan han rehimen US-Marco, ngan agud igpasulong an gerra han katawhan.

An pag-inaringasa han kumander han 19th IB nga hi Lt. Col. Ricky James L. Rosalejos ha lehitimo nga armado nga aksyon ha Las Navas usa la ha damo nga pananglitan han butaray nga pagbinuwa han mga pabrika han fake news han 8th Infantry Division.

Alipures hi Rosalejos han mga utok-pulbura niya nga bosing ha rehimen Marcos ngan AFP, nga nadiri magdeklara hin ukoy-bubgto agud tagan-lugway an mga selebrasyon han masa han Pasko ngan Bag-o nga Tuig. Andam hira nga gasgason an mga uruubos nga tawuhan ni Rosales ha mga magastos, mapagal, ngan waray-pulos nga operasyon nga mas napagrabe la han kangalas han masa ha estado. Ginsasalikway gud nira an tinuod ngan panmaihaan nga kamurayawan ngan ha sobra nga kahadlok ha rebolusyunaryo nga kagiusan, hul-os nga nahasog ha pasismo agud puypuyon an rebolusyunaryo nga hingyap han katawhan.

Kundi diri mapupugngan an pag-abante han rebolusyunaryo nga pakigbisog han katawhan labina nga ginsisingabot hini an kagiusan pagtutul-id ngan nakatalaan nga magkab-ot pa hin mga kadaugan ha tidaraon. Ini an magigin tema han selebrasyon han ika-57 nga anibersaryo han Partido, nga iglalansar ha mga prente gerilya ha bug-os nga nasud gawas han mga mata ngan talinga han pasista nga militar.