Septyembre 23 alas 7:00 sang aga may masobra 20 ka tropa sang 62nd IB nga nag-operasyon sa Sityo Palasan, Barangay Guba, Vallehermoso, Negros Oriental. Kadungan man sini may nag-operasyon man nga tropa militar sa Sityo Binil-iwan, Barangay Calupaan, Guihulngan City, Negros Oriental. Ginabulubanta masobra sa 20 ka tropa militar ang nagapangsaka-saka sa mga kabalayan sang mga mangunguma.

Samtang halin sadtong Septyembre 19 tubtob karun nga adlaw Sabado, Septyembre 23 padayon nga nagatiner ang 14 ka tropa sang 62nd IB malapit sa eskwelahan sang Sityo Kambairan Elementary School sa Barangay Trinidad, Guihulngan City. Sa tion sang kagab-ihon nagapangsaka-saka sa mga kabalayan kag nagapamahug sa pumuluyo sa lugar.

Halin sadtong Septyembre 13 asta subong nga adlaw Septyembre 23 padayon man nga nag-operasyon ang 150 ka tropa sang 62nd IB sa Barangay Santol kag Barangay Amuntay tanan sang Binalbagan, Negros Occidental. Karun makita ang nasambit nga mga tropa sa Sityo Tambo, Barangay Santol, Sityo Nabirasan kag barangay hall sang Barangay Amuntay tanan sang nasambit nga banwa.

Pabilin man ang pagtiner sang masobra 100 ka tropa sang 62nd IB sa Sityo Aguntilang Uno, Dos, Tres kag Sityo Camandagan tanan sang Barangay Riverside, Isabela, Negros Occidental. Sa gihapon nagapangsaka-saka sa mga kabalayan kag nagapamahug sa mga residente. Ginapasibangdan sila nga mga suporter sang New People’s Army (NPA) halin pa sadtong Agosto 30 tubtob subong Septyembre 23.

Ang presensya sang militar sa kaumahan sang Central Negros ang nagkugmat sa mga mangunguma kag nagadisturbo sa mga pagtuon sang kabataan sa mga buluthuan suno pa sa mga residente.