Makatawenen iti napalabas idi kinigtot tayo iti damag iti parbangon ti Pebrero 14, 2020 nga idi rabii sakbay daytoy nga aldaw, Pebrero 13, ket awanan asi a pinalpaltogan dagiti elemento ti 81st IB dagiti tallo a kakadua a nakidagus iti maysa a kalapaw idiay Santa Lucia, Ilocos Sur! Isuda Julius “Ka Goyo” Marquez, Eniabelle “Ka Onor” Balunos, ken Ma. Finela “Ka Ricky” Mejia; aw-awagan tayo isuda kas 3 Ilokos Martyrs!

Para kadagiti mannalon iti Ilokos, malaglagip tayo dagiti tallo a banuar gapu ti naindaklan a panagayat da kadatayo. Saan tayo a malipatan dagiti insursuro da a panangilaban iti karbengan pangtao ken pananggun-od kadagiti pang-ekonomya a pagimbagan. Kadakkelan a naadal tayo ti napinget a panangur-urnos iti mismo nga intar tayo a marigrigat ken magunggundawayan tapno mabukel ti tured ken pigsa tayo a mangsaranget iti mapang-allilaw ken mapangsugsog a taktika dagiti naranggas a militar a ti ultimo a panggep da ket paulimeken tayo a mangilablaban iti kalintegan. Saan tayo a malipatan a babaen laeng iti pannakikapet-takyag tayo kadagiti pudpudno a soldados ti umili a magun-od ti pudpudno a rang-ay ti biag.

Para kadagiti berdugo nga elemento iti AFP, saan mi a malipatan a dakayo ket agserserbi kadagiti boss yo a ti panggep da ket paksiaten dagiti pudno nga agserserbi iti interes dagiti mayorya a marigrigat nga umili a pakaibilangan mi a mannalon, mangngalap, ken aldawan a mangmangged ken makitegtegged. Mersenaryo kayo! Mabaybayadan iti dakkel a kwarta nga aggapgapu iti buwis ti umili tapno laeng mangkettel ti biag dagiti tao a saan nga agpabpabayad iti umili ngem makibibiag ken makidangdangadang para iti interes ti kaaduan a makaruk-at iti panaggunggundaway dagiti agar-ari a dasig tapno agturong iti panangsagrap iti pudno a panagpapada ken kappia.

Aldaw dagiti puso itatta. Ammo mi nu sinno dagiti addaan ti napudno a panagayat ken naimpusoan a panagserbi kadakami.

Agbiag ti lagip dagiti 3 nga Martir ti Ilokos!

Agbiag dagiti NPA – dagiti pudno a soldados ti umili!

Agbiag dagiti demokratiko a rebolusyon ti umili!