ILOILO — Napaslaw sang New People’s Army (NPA) ang Armed Forces of the Philippines (AFP) sa target sini nga waskon ang armado nga kahublagan sa Panay pag-abot sang Marso 2020, pahayag ni NPA spokesperson Julio Montana sang nagligad nga adlaw sang Myerkules.

Ang NPA ang magaselebrar sang ila ika-51 nga anibersaryo sang pagkatukod sa Marso 29. sa idalum sang pagpamuno sang Communist Party of the Philippines (CPP), ini ang gintukod sa probinsiya sang Tarlac sa Northern Luzon sang tuig 1969.

Sa iya nga pahayag, gintumod ni Julio Montana sang Coronacion ìWaling-walingî Chiva Command, ang rehiyonal nga organisasyon sang NPA sa Panay ang nag-agum sang mas dalagku nga kadalag-an kag mga leksyon sa sulod sang isa ka tuig sa bug-os nga pungsod. Natigayon sini ang paglunsar sang masobra 40 ka taktikal nga opensiba nga nagpapas sang katumbas sa isa ka kumpanya sang ginkombinar nga pwersa sang militar, pulis kag paramilitar sa Panay. Ila gin-ako nga nag-angkon sila sang tatlo ka kaswalidad.

Gindeklarar man sang NPA nga wala nagmadinalag-on ang plano sang militar nga papason ang armado nga kahublagan sa Panay pagkatapos sang Marso 2020. ini sa pihak sang ila pagpilit sa mga local government units nga ideklarar nga “persona non grata” ang NPA. Samtang pasulit-sulit na nga nag-anunsyar ang 3rd Infantry Division sang Philippine Army nga waskon sini ang NPA sa pagtapos sang subong nga bulan

Ang NPA ang nag-akusar sa militar nga ginapwersa sini ang mga local government units kag brgy. Officials para magtukod sang mga counter-insurgency task force kag maghiwat sang mga ìmass surrenderî sang mga sibilyan nga mangwartahan bilang kabahin sang ila psychological warfare kag propaganda.

Suno kay Montana, ginagamit ni Presidente Duterte ang CoViD-19 pandemic nga rason para mangin isa ka lubos nga diktador. Ginahimuslan ni Duterte ang isterya nga tuga sang iya kriminal nga kapabayaan para sa dugang nga paglupig sa pumuluyo.

Ginalauman nga ang ginhatag nga emergency powers ang pagagamiton ni Duterte para tapnaon ang anuman nga porma sang pagsupak kag pagbato.

Nagapanindugan si Montana nga ila ginasuportahan ang pahayag sang CPP nga indi pagsabton ang unilateral ceasefire ni Duterte. Iya gintumod nga ang ceasefire sang gubyerno isa ka malisyoso nga psychological warfare nga nagatuyo hingabonan ang nagasingki nga mga opensiba nga operasyon sang AFP kag PNP. Padayon gihapon ang pagpang-aresto kag pagpamatay sang mga ligal kag demokratiko nga mga indibidwal bisan pa nga may nagaluntad nga ceasefire.

Gin-anunsyar sang NPA nga magapabilin sila sa modo sang aktibo nga depensa kag nakahanda nga makig-away para batuan ang nagapadayon nga operasyon sang mga pulis kag militar. Sila man ang nagapanawagan sa pumuluyo nga maghugpong kag batuan ang kalalat-an nga dala sang rehimeng US-Duterte.
##