Simula kahapon, Enero 28, inokupa ng mga militar ang mga barangay sa bayan ng Palanas kabilang rito ang Intusan, Salvacion, San Carlos, San Isidro, Buenasuerte, Malibas at Cabrera sa bayan ng Dimasalang. Inokupa at ginawang himpilan ng militar ang mga komunidad at sentro ng baryo tulad ng plasa at basketball court.

Hindi na rin umalis ang militar sa Barangay Rizal, Dimasalang matapos ang kanilang pangraratrat nito sa kabahayan na ikinasugat ni Marcial Detalo noong Enero 19.

Walang koordinasyon sa lokal na pamahalaan at mga lokal na upisyal ng barangay ang pagpasok ng militar sa mga nabanggit na lugar. Hindi malinaw sa kanila kung ang mga dumating na militar ang magbabantay para sa pangangampanya ng mga pulitiko sa lugar. Sa halip, ipinatawag pa ng mga militar ang mga barangay upisyal na nagpapakita sa kanilang paghahari-harian. Pagpapakita rin ito na tuwirang kinukubabawan ng batas ng militar ang lokal na burukrasya sa prubinsya.

Labis na nag-aalala sa kanilang kaligtasan ang mga residente sa mga lugar na may mga presensya ng militar. Nangangamba silang tulad ng nangyari sa Barangay Rizal, Dimasalang ay malagay sa peligro ang kanilang mga buhay. Batid nilang wala sa bokabularyo ng mga pasistang militar ang pangalagaan ang kanilang kaligtasan. Sa halip, ito pa ang naglalagay sa kanila sa tiyak na kapahamakan at naghahasik ng karahasan tuwing nanghahanting ng maaaring biktimahin sa panahon ng kanilang mga operasyon.

Hindi ito maiiba sa panahon ng pananalasa ng RCSP na nag-okupa rin sa mga barangay. Tiyak na ang mga ordinaryong sibilyan ang magdurusa.

Ang masa ang pangunahing napeperwisyo sa mga operasyon ng militar na nagsasapeligro sa kanilang buhay at kabuhayan laluna nang mga magsasaka. Nililimitahan nito ang oras ng pagtrabaho sa kanilang mga sakahan at pinala-logbook ang labas-pasok na mga tao sa lugar. Maging ang pagbili ng maramihan ay kinikwestyon at ipinagbabawal ng mga militar. Tuwing gabi ay pinapapatrolya at pinagbabantay ang mga kagawad ng barangay habang sila ay mahimbing na natutulog. Maging ang kanilang pampaligo ay ipinaiigib pa sa mga upisyal ng barangay o residente sa lugar.

Ang sinumang hindi sumunod sa kanilang mga atas ay pinararatangang NPA at binabantaang kakasuhan. Ginagamit ng militar ang mga kontra-insurhensyang mga batas at programa upang pasunurin ang mga residente sa mga lugar na kanilang inokupa.

Habang nagpapakalat ng mga kontra-rebolusyonaryong mga kampanya at propaganda. Pasimuno naman ang mga militar sa paggawa ng mga krimen sa lugar. Halos araw-araw na nag-iinuman ang mga ito kung saan ang mga alagang hayop ng mga residente ang pinagnanakaw ng kanilang mga utusang CAFGU at ginagawang pulutan. Bumabalik ang bentahan at paggamit ng droga laluna sa hanay ng kabataan at ang pagtayo ng mga grupo tulad ng praternity o gang. Binibiktima rin ang mga kababaihan maging ang may mga asawa ay hindi pinalalampas sa kanilang pambabatos at pambababae.

Marami ang mga nagmamay-ari ng tindahan o maliliit na sari-sari store ang nagrereklamo dahil umaalis sa kanilang lugar ang mga militar na hindi binabayaran ang kanilang mga utang. Ang iba ay napilitang tumigil sa pagtinda sa takot na tuluyang malusaw ang kanilang puhunan.

Walang kasing kapal ang mga pagmumukha ng mga pasistang militar. Sa laki ng inilaang badyet ng rehimeng US-Marcos Jr na pondo para sa kontra-insurhensyang programa nito at dobleng pagtaas ng sahod ng militar ay nagagawa pa nitong nakawan ang mga mahihirap na mamamayan. Ang imaheng ito ng mga pasistang militar ang nakaukit sa kaisipan ng masang Masbatenyo na nagpapasiklab sa kanilang galit.

Ang umaapoy na galit na ito ng mamamayan ay minsan nang pinahupa noon ng militar. Sa ngayon, sila mismo ang nagtulak sa masa upang magalit at lahatang-panig na lumaban. Mapangahas ngayong kumikilos ang mamamayan upang ilantad at malabanan ang mga mapanupil sa karapatan at duguang kamay na mga militar.

Ang mga lokal na upisyal at mga kagawad ng barangay ay naninindigan na rin para pangalagaan ang kaligtasan ng kanilang mga nasasakupan at manguna sa paglalantad sa krimen ng mga militar. Tinutulungan ang sinumang maging biktima ng mga pasistang militar na magsampa ng kaso at tinitiyak ang narararapat na suporta upang mapanagot ang mga pasistang kriminal at makamit ang hustisya para sa mga biktima.

Ipinararating naman ng Bagong Hukbong Bayan (BHB) ang walang hangganang pakikiisa at pagsuporta sa paglaban ng masa. Tinitiyak rin ng BHB na magbabayad ang lahat ng may utang na dugo sa masang Masbatenyo laluna ang mga pusakal na kriminal na mga militar at mga ahente nito.

Hinihikayat rin nito ang mga masa laluna ang kabataan na nasa hustong gulang na sumampa sa BHB upang humawak ng armas at isulong ang pambansa-demokratikong rebolusyon. Tanging ito lang ang magtitiyak sa atin na makamit ang tunay na kaligtasan, kapayapaan at kaunlaran sa minamahal nating prubinsya.