Nagmalampuson ang gipahigayong operasyon dikit ang Kabataang Makabayan-Southern Mindanao Region (KM-SMR), atol sa bisperas sa ika-53 nga tuig nga paghinumdom sa pagdeklara og martial law ni Marcos Sr. Dungan usab niini, nagsabwag ang KM-SMR og kopya sa Ang Bayan sa nagkalain-laing parte sa sentro sa dakbayan sa Davao.

Inubanan usab sa aktibidad ang pagpaningil sa anak sa diktador nga si Marcos Jr. ug ang pagpanubag sa mga Duterte. Dala usab sa mga kabatan-unan ang panawagan sa pagbungkag sa burukrata kapitalismo lakip na ang panawagan para sa pagsilot sa mga abusado ug kurakot sa reaksyunaryong gubyerno.

“Miulbo ang kasuko sa katawhan tungod sa milutaw nga mga isyu sa kurapsyon kung diin binilyon ang gikurakot sa mga pulitiko ug kontraktor gikan sa katawhan,” ingon ni Karina Magtanggol, ang tigpamaba sa KM-SMR. “Imbes nga gamiton ang mga pondo para sa serbisyo sa mga tawo, naa na hinuon kini sa bulsa sa pipila.

Militanteng gidala sa mga kabatan-unan ang panawagan sa pag-asdang sa demokratikong rebolusyon sa katawhan nga giingong solusyon sa nagkagrabeng krisis sa katilingban. Ang demokratikong rebolusyon sa katawhan mao ang programa sa nasudnong demokrasya para batukan ang tulo ka batakang problema sa katilingban: imperyalismo, pyudalismo ug burukrata kapitalismo.

“Kada adlaw nga mulabay, nagkalig-on ang pagtuo sa katawhan nga dili reporma lang sa bulok nga sistema ang tubag,” ani Karina Magtanggol. “Kada adlaw, mapamatud-an nga rebolusyon ang gikinahanglan sa pagkab-ot sa tinuod nga kabaghuan sa katilingban.”

Ingon pa ni Karina Magtanggol, ang kasamtangang sistema ang nag-anak sa mga sama nila Marcos ug Duterte nga nagpahamtang og pasismo sa katawhan. Mikabat sa liboan ang mga natala ng paglapas sa tawhanong katungod panahon ni Marcos, sama usab sa rekord usab ni Duterte. Sila Marcos ug Duterte, matod pa sa KM-SMR, walay kalainan ug mga representante sa burukrata kapitalismo, kung diin ginahimong negosyo ang panggamhanan. Ingon pa ni Karina Magtanggol, tungod sa nagkagrabeng mga krisis, nga nagapadayon ang pagdaghan sa mga myembro sa KM-SMR.

“Nakita karun sa mga kabatan-unan ang bili sa rebolusyon. Taas na karun ang ilang pangandoy. Kini ang pagdaug sa rebolusyon sa katawhan. Kabalo ang mga kabatan-unan nga dili nila kini mahimo og sila lang. Dapat nga hiusahon usab ang katawhang gidaug-daog ug gipahimuslan, ilabi na ang mga mamumuo ug mga mag-uuma.”

Madasigong gidala sa KM-SMR ang panawagan sa katawhan. Ginatikangan na sa mga myembro sa pagkakarun, ingon ni Karina Magtanggol, ang konserbatismo sa paglihok maskin pa naay hulga sa red-tagging, pagpanghasi, at sarbeylans at ang miltarisasyon, ug de facto martial law sa Mindanao.

“Taliwala sa pasismo sa SMR ug sa tibuok isla sa Mindanao, dili mapunggan sa reaksyunaryong pwersa sa estado ang nagdilaab ang kasuko sa katawhan. Ihampak sa katawhan ang ilang kasuko dinha sa mga reaksyunaryo sama nila Marcos, Duterte ug sa mga mersenaryong AFP-PNP,” matod pa ni Karina Magtanggol. “Binilyon ang gipondo sa NTF-Elcac ug sa pondo sa intelidyens ni Marcos Jr., pero gipamatud-an na sa kasaysayan nga hangtod dili hatagan og tubag ang ugat sa kalisod sa katawhan, dili niini mapildi ang rebolusyonaryong kalihukan sa padayong nagapalapad sa kasamtangan.”