Lehitimo nga miltary action batuk sa lehitimo nga military target ang gintigayon sang yunit sang NPA sang Marso 3, 2021 kontra sa pwersa sang PNP sa Brgy. Canawili, Janiuay, Iloilo.

Wala sang intensyon ang NPA nga atakehon o halitan si Iloilo Gov. Arthur Defensor o Janiuay Mayor Ben Margarico kag iban pa nga sibilyan nga tuyo kuntani magkadto sa Brgy. Panuran, Janiuay, lloilo para magtambong sa inagurasyon sang ila proyekto. Sa tanan nga tion bitbit sang kada hangaway kag yunit sang NPA ang disiplina nga kutob masarangan likawan nga maulamid ang mga sibilyan sa mga operasyon kag inaway nga ginalunsar sang NPA bilang hugot nga pagsunod sa Protocol II sang Geneva Conventions angut sa Layi sang Gera. Kabaliskad ini sa ginahimo sang AFP kag PNP nga wala patugsiling sa pagpalupok sang ila armas bisan pa nga may masalabat nga mga sibilyan kag simple lang nga kabigon nga disgrasya 0 patu-patuan nga mga NPA ang ila naigo o napatay nga mga sibilyan.

Gani liwat nga ginapalab-ot sang NPA-Panay sa tanan nga pumuluyo nga likawan nga mag-upod o magsakay sa anuman nga salakyan sang militar kag pulis para indi masalabat sa panahon sang mga inaway nga ginalunsar sang NPA. Ginapaabot man sang NPA sa mga sibilyan nga opisyal sang gobyerno nga likawan nga magdala sang mga escort nga pulis kag militar sa ila pagsulod sa mga teritoryo nga sakop sang rebolusyonaryo nga kahublagan kay indi man makaproteher sa inyo ang pwersa sang PNP kag AFP.

Paano sila makaproteher sa inyo kay sila mismo ang nagapamahug kag nagapamatay sa pumuluyo nga amo tani ang ila dapat nga dampigan pareho sang ginhimo nila nga pagmasaker sa siyam ka lider nga Tumandok kag pag-aresto sa 16 ka iban pa sa Tapaz kag Calinog sang Disyembre 30, 2020 kag pagpatay kay Brgy. Capt Julie Catamin sang Brgy. Roosevelt, Tapaz sang Pebrero 28, 2021?

Sila mismo ang nagapinatyanay pareho sang natabo nga shoot-out sa Jolo sa tunga sang militar kag pulis sang nagligad nga tuig kag sang damlag lang sa tunga sang PDEA kag PNP sa Quezon City.

Angkon ang wala nagakahubas nga suporta sang pumuluyo, padayon nga magalunsar sang mga maikit nga taktikal nga opensiba ang NPA para tapnaon ang nagasingki nga pagpamintas sang berdugo nga AFP kag PNP. Nakahanda sa tanan nga oras ang NPA agud bunalon ang pasista nga mga tropa sang pulis kag militar nga nagatuga sang kahalitan sa kabuhi, palangabuhian, kinamatarung, kalinong kag katawhayan sang pumuluyo nga pigos kag ginahimuslan.