Nagakalipay ang Pambansang Katipunan ng mga Magbubukid (PKM)-Negros sa pagkahilway sa prisohan sang Himamaylan 7 kag isa pa ka mangunguma. Ang ginatawag nga Himamaylan 7, (anum ka mangunguma kag isa ka pastor sang United Church of Christ of the Philippines (UCCP) sa Barangay Buenavista, Himamaylan City, Negros Occidental nga gindakop sadtong 2019 paagi sa himo-himo nga kaso nga kabahin sila sa pagpang-ambush sa militar sadtong Mayo 2018 sa Barangay Tan-awan, Kabankalan City, Negros Occidental. Samtang sang nagligad nga tuig gindakop man ang isa pa ka mangunguma nga kalakip sa amo nga kaso.

Kon madumduman sang 2018 ginpatuman sang rehimen Duterte ang E.O 32 sa isla sang Negros, bilang isa sang prayoridad nga pokus sang iya kontra-insurhensya nga programa. Paagi sini ginpuno sang madamo nga tropang militar ang mga kaumhan sang isla agud sa plano nga gilayon nga papason ang rebolusyonaryong kahublagan sa bug-os nga isla. Apang ang mayor nga ginputirya sini ang mga inosente nga mangunguma nga nagapuyo sa kaumhan nga ginapasibangdan sang militar nga mga tigsuporta sang New People’s Army (NPA).

Ginpalala pa gid ini paagi sa pagpasar sang E.O 70 nga amo ang pagtukod sang NTF-Elcac, nga nangin instrumento sa pagpatuman sang sistematiko nga pagpang-atake sa kubay sang mga mamumugon, mangunguma kag sa iban pa nga mga demokratikong sektor. Patarasak kag todo larga ang pagpamatay, tortyur, pagpangdakop, pagpangastigo, pagpambomba, rape, pagpangawat sa mga probyedad sang pumuluyo, kag iban pa nga mapintas nga buhat batok sa pumuluyo.

Ang isla nangin laboratoryo sang madamuan nga pagpamatay kag pagpang-aresto, kaangay sang Oplan Sauron 1 sa Guihulngan City kag Oplan Sauron 2 sa Canlaon City nga nagpatay sang 20 ka mangunguma kag nag-aresto sang masobra 50 ka indibidwal, ang Himamaylan 7 kag ang crackdown sa syudad sang Bacolod nga nag-aresto sang 57 ka mga progresibo nga personalidad kag Escalante City nga nag-aresto sang 10 ka mangunguma.

Maathag nga ining paggamit sang pasismo sang reaksyonaryong estado batuk sa pumuluyo, ilabi na sa malapad nga mangunguma sa kaumhan agud punggan kag pahipuson ang malapad nga demokratikong sektor sa pagpamatuk sa kontra-pumuluyo nga patakaran sang reaksyunaryong estado.

Gingamit man ang AFP, PNP kag mga panatiko nga grupo para protektahan ang interes sang mga dumuluong kapitalista sa lubos nga pagpatuman sang neoliberal nga polisiya, nga nagreklasipika sang mga dutang agrikultural para tamnan sang mga komersyal nga pananum pareho sang 6,562 ektarya nga oil palm sa Candoni nga nagresulta sang lapnagon nga landgrabbing kag pagguba sang kapalibutan kag nagdislokar sang libo-libo nga mga mngunguma. Sa mga kasyudaran ang pagpatuman sang reklamasyon nga magapalayas sang mga imol nga taga syudad sa ila mga ginapuy-an.

Ang masakit nga inagihan sang pasismo sang malapad nga masang mangunguma, mamumugon upod sa iban pa nga sektor sang nagligad nga rehimen Duterte kag subong sa panahon sang US-Marcos II nga rehimen amo ang kongkreto nga eskwelahan nga mas nga magpukaw, mag-organisa kag magpahulag sa ila agud pukanon ang mala-kolonyal kag mala-pyudal nga sosyedad nga nagahalit sa ila.

Sa kasaysayan sang isla napagkit na ang maragtason nga inagihan sang mangunguma sa paglunsar sang lain-lain nga mga porma sang pagpakigbato para maangkon ang matuod nga reporma sa duta, kahilwayan kag demokrasya. Indi mapunggan sang nagahari nga sahi kag reaksyunaryong estado ang nagadaba-daba nga kaakig sang malapad nga pumuluyo nga amo ang puhunan agud mas isulong kag daugon ang demokratikong rebolusyon sang banwa.

Ang PKM-Negros nagapanawagan sa tanan nga mga mamumugon, mangunguma kag sa iban pa nga sektor nga maghimakas agud mawasak ang imperyalismo, burukrata kapitalismo kag pyudalismo nga amo ang nagaulipon sa ila. Ginapanawagan man sa malapad nga mangunguma nga upod sa iya malapit nga kaalyado nga mamumugon nga madamuan nga magpakigbahin sa NPA agud masulong ang armadong paghimakas tubtob sa kadalag-an.##