Pagserbiyen ti lagip ni Kadua George “Ka Oris” Madlos kas narimat a silaw iti amin a rebolusyonaryo a puersa ken umili iti Ilocos-Cordillera

English

Makikaykaysa ti Chadli Molintas Command – BHB Ilocos-Cordillera Region iti National Operational Command ken iti amin a regional operational command iti intero a pagilian iti panangkundenar iti nadangkok a pammapatay kenni kadua a George “Ka Oris” Madlos ken ti kadua na a medik bayat nga agbibiahe para iti medical check-up na. Ipadpadanon mi met laeng ti naimpusoan a pannakiladingit iti pamilya, kakabagian, gagayyem ken amin a mangipatpateg kada Ka Oris ken Ka Pika.

Da Ka Oris ken Ka Pika ket saan nga armado ken awanan gaway a lumaban idi napapatay da. Dagiti addang ken napangas a balbalikas ti AFP partikular dagiti opisyal ti 4th ID nga idadauloan ti agbibisin iti dara ken takrot a kumander da a ni Maj. Gen. Romeo Brawner kalpasan ti pannakatay ni Ka Oris ket pagduaduaan ken napnuan ti kinaulbod. Nalawag a pakakitaan daytoy ti awanan bain a panaglabsing kadagiti linteg a nailanad iti Artikulo 3, Protocol 2 ti Geneva Conventions. Linaon ti nasao nga artikulo ti sumaganad: “Dagiti tao a saanen a makipaset iti labanan, karaman dagiti kameng ti armado a puersa a nangibaba ti armas da ken dagiti naawanan gaway a lumaban wenno maawagan a hors de combat gapu iti sakit, sugat, pannakaibalud, wenno dadduma pay a makagapu, ket matrato a makatao iti amin a sirkumstansya….”

Natay ni Ka Oris iti alas-8 ti rabii ti Oktubre 29 ngem agkedked ti militar nga ited ti bangkay na iti pamilya na ken minamaag nga impablaak da a naakaran kano isuna ti Covid-19, kas basaran ti panangikamakam ti cremation (panangpuor) iti bangkay na. Ngem awan pulos ti naaramid a medical examination a nakasango ti asinoman a kameng ti pamilya na. Kasta met a ti desisyon nga i-cremate ti bangkay na ket saan a naikonsulta iti pamilya na. Ti kinapudno na, naikamakam ti cremation tapno ilimed ti naranggas a wagas ti panangpatay kaniana.

Agam-amangaw ni Gen. Brawner iti salawasaw a sao na a ti awanan bain nga overkill ti saan nga armado ken agsaksakit a lakay a kas kenni Ka Oris ket mangpilay kadagiti armado a rebolusyonaryo a puersa iti Mindanao ken intero a pagilian. Napalalo unay ti kinatangsit ken kinatanga ni Brawner iti panangipanawagan nga agsurender ti baket ni Ka Oris a ni kadua Maria Malaya ken dagiti Nalabbaga a kumander ken Nalabbaga a mannakigubat tapno saan da a matulad kenni Ka Oris. Awan ti dayaw iti panangpatay ti maysa a saan nga armado ken agsaksakit a rebolusyonaryo kas kenni Ka Oris. Adda ti pagsasao dagiti panglakayen iti Ifugao a naggapuan ni Brawner para kadagiti nalastog ken ulbod – LANGKAK! Ti maawat mo a nadara a medalya ken promosyon ken killo a kapanunotan ti kinabanuar ket nadagsen unay a dildillawen ti mayorya dagiti maidadanes ken magungundawayan a masa.

Sumagmamano a tawen ti napalabas, inanusan ni Ka Oris a pagnaen dagiti nangangato a kabambantayan ken agballasiw kadagiti napegges a karayan tapno bumisita iti maysa a larangan gerilya iti Rehiyon nga Ilocos-Cordillera. Iti ababa ngem saan a malipatan a pannakilangen na kadagiti kakadua iti rehiyon, malagip unay ti panangtalmeg na iti nasken a kinakasapulan ken kasano a rimbawan ti konserbatismo iti pulitika ken militar tapno iyabante ti armado a rebolusyon iti nangatngato a tukad. Naiyebkas na ti nauneg a panangapresyar iti rebolusyonaryo nga optimismo ken regta nga impakita dagiti kakadua iti rehiyon. Naragsak met laeng nga inistorya na a dayawen na ti napintas a langa ti kabambantayan ti Cordillera ken ti saan a maparmek a pakinakem dagiti mannalon nga Igorot iti panagsukay ti ansestral a daga da. Iti mano a siglo, dagitoy nga ansestral a daga ket nainget ken kolektibo a sinalakniban dagiti nailian a minorya ti Cordillera, ken agtultuloy a depdepensaan da iti uneg ti agdama a malakolonyal ken malapyudal nga agturturay a sistema babaen iti panangiyabante ti gubat ti umili.

Ipatpateg tayo ti patawid ni Ka Oris kas silaw ti awanan panagimbubukod a panagserbi iti masa ken rebolusyonaryo a kinaandur iti tengnga dagiti narigat a personal a kasasaad na. Saan a nanglapped ti sinagsagaba na a napaut a sakit ti kidney iti nasurok tallo a dekada a panangipatungpal kadagiti naikeddeng nga akem na iti amin a kabaelan inggana ti pannakatay na.

Nabaelan dagiti pasista a mersenaryo ti AFP a gibusan ti biag na ngem ti patawid nga imbati na kadatayo ket sigurado nga agserbi kas inspirasyon iti rinibribu a napasnek a rebolusyonaryo nga itultuloy ti panagabante ti armado a rebolusyon ti umili inggana iti naan-anay a balligi.

Pagserbiyen ti lagip ni Kadua George “Ka Oris” Madlos kas narimat a silaw iti amin a rebolusyonaryo a puersa ken umili iti Ilocos-Cordillera