Sadtong Martes, Marso 11 sa mga alas 8:40 sang aga, madinalag-on nga natigayon sa isa ka yunit sang Roselyn Jean Pelle Command-New People’s Army (RJPC-NPA) ang pagsilot sa notoryus nga intel aset sang Armed Forces of the Philippines (AFP) kag lider sang lokal nga grupo sang tulisan sa Sitio Tinawgan, Barangay Consing, E.B. Magalona, Negros Occidental.

Ginpamatbatan sang rebolusyonaryong hustisya si Efren Solinap alyas “Dacol” bangud sa krimen sang pagpang-espiya kag pagtulis-patay kon sa diin siya nakonbikto matapos ang isa ka patas kag wala sang ginadampigan nga hudisyal nga proseso sa nakaigo nga sangay sang Korte sang Pumuluyo.

Magluwas sini, ang pagsilot sa iya madugay na nga gindemanda sang masa nga amo ang naga-antus sa iya mga anti-sosyal na hinimoan.

Ginhatagan man siya sang paigo nga panahon agud magbag-o, nga naglab-ot pa gani sa pila ka tuig. Apang tubtob sa katapusan nagapabilin siya nga isa ka masupog nga kontra-rebolusyonaryo kag kriminal.

Bilang aktibo nga espiya kag nagpakigbahin sa mahigko nga gyera sang AFP, nagaserbi si Solinap nga giya sa mga operasyon militar, nagakoordina sa mga intelligence network sa lokalidad, nagared-tag, nagapamahog kag nagapanilag sa mga sibilyan sa hapaw nga suspetso nga may angot sila sa rebolusyonaryo nga kahublagan.

Bilang lider sa grupo sang tulisan, imbolbado si Solinap sa madamo nga kaso sa hold-up kag pagpatay sa malawig na nga tinuig. Ang iya pinakaulihi nga kaso amo ang pagtulis kag pagpatay sa isa ka kolektor sang nagapautang nga ahensya.

Ang pagsilot kay Solenap isa ka maathag kag mabakud nga paandam nga pasabton ang sin-o man nga magahimo sang kalakasan sa kaayohan sang pumuluyo.

Gani, nagapanawagan ang RJPC-NPA sa tanan nga intel aset sang AFP kag sa mga nagapalapnag sang mga anti-sosyal nga hinimoan sa E.B. Magalona kag kaingod nga mga lugar nga mag-surender sa pinakalapit nga yunit sang NPA sa indi pa magalab-ot sa ila ang malaba nga kamot sang rebolusyonaryong hustisya bisan diin pa sila.