Gina-ako sang Napoleon Tumagtang Command, New People’s Army ang pagpangsunog sang 14 ka motorsiklo nga ginapanag-iyahan sang mga CAFGU kag armi nga nagagwardya sa kompanya sang Century Peak, sa Sityo Insobrehan, Brgy. Igcabugao, Igbaras, Iloilo sadtong Marso 21, 2022.

Sa pihak nga bahin hugot namon ginakondenar ang malisyuso kag binutig nga pahayag ni Capt. Apitong, spokesperson sang 3ID Phil Army nga kuno ginlakip sang NPA sunog ang motorsiklo nga ginapanag-iyahan sang mga sibilyan. Luyag lang ni Apitong hinabunan ang ila kahuy-anan kag kapalpakan sa intelligence. Maid-id nga ginpanilagan sang mga kaupod ang lugar para maseguro ang target kag wala sang madalahig nga propyedad sang sibilyan.

Ginpatuman sang yunit sang NPA ang nasambit nga aksyon para dulaan sang madasig nga mobilidad ang CAFGU kag kontroler sini nga bulag nagadepensa sang interes kag kagamitan sang Century Peak. Kon madumduman pa, ginpenahan sang NPA sadtong Disyembre 2015 ang nasambit nga kompanya bangud sang indi paghatag sang nagakaigo nga sweldo kag benipisyo sa ila mga obrero, indi paghatag sang nagakaigo nga kumpensasyon sang kadutaan kag ulumhan nga nadalasa sang ila proyekto. Humalin sadto, ang Phil Army nga ginaswelduhan halin sa buhis sang pumuluyo nangin “blue guards” na sang Century Peak.

Indi dapat himuon nga palahog sa mga turista ang NPA! Wala sang ginhalitan nga turista ang NPA. Sa baylo, sa kunsaran sang bukid Napulak mismo may nga ginbulong ang medik sang NPA nga turista bangud indi na ini makatakod maglakat. Sang 2011, may grupo sang turista nga nagsaka sa Igcabugao nga nagpamalibad magpagwardya sa 82nd IB, PA nga nakabase sa ila Coy HQ sa Brgy. Igtalungon, Igbaras. Kag bangud namilit gid ang army, temprano nga nagpanaog ang mga turista bangud nahadlukan sila mag-upod sa Phil. Army. Indi dapat kahadlukan sang pumuluyo ang NPA bangud ini ang matuod nga hangaway sang banwa, tunay nga hangaway sang masa!