Kadungan sang nabulgar na “ghost projects” sa flood control projects, farm to market roads, pork barrel, kag iban pa nga proyekto kag programa sang gobyerno nahibaluan man nga may “ghost” or substandard projects sa sulod mismo sang mga kampo militar sa bilog na Pilipinas. Parte ini sang Tatag ng Imprastraktura para sa Kapayapaan at Siguridad ukon TIKAS, kung sa diin mga 15 billion pesos ang ginhatag sang congreso para sa mga kampo militar. Sumatotal may 944 ka proyekto sa idalum sang TIKAS ang wala pa natapos ukon mas malala “ghost”. Gapakita lamang ini nga tanan dugang sa pagkapasista sa ulihi nga tako mersenaryo kag kwarta lamang ang lagas sang AFP ilabi na ang mga mataas na opisyal sini.

Sa partikular diri sa isla sang Panay, sa mismo nga headquarters sang notorious na 61st IB may ara sang overdue ukon tuman ka delayed na proyekto. Ini ang construction sang administration building, mess hall, barracks, and road concreting sa kampo sang 61st IB nga nagabalor 15.2 million pesos pero dapat sang January pa natapos apang asta subong 41.58% finished pa lamang. Mismo ang subcontractor diri kay wala na sang iban kundi ang Sunwest, kumpanya ni Zaldy Co, nga numero uno nga congressman na dawit sa flood control scam. Halin ini sa sub-contract sang 96.2 million pesos balor na proyekto ang A.D. Pendon construction nga lakip sa “big three” flood control companies diri sa Panay.

Dugang lang ini sa malaba nga kasaysayan sang AFP bilang isa ka mersenaryo kag hayok sa manggad nga klase sang Hukbo. Wala pa malipatan sang pumuluyo ang 1.5 billion na “Pabaon Scandal” sang AFP, Fake surrendees, kag adlaw adlaw nga korapsyon sa AFP. Pamatuod ini nga ang AFP hindi tampad magserbisyo, kag handa permi magpigos sa pumuluyo kag basta bayaran lang sang ila mga amo.

Gani panawagan naton sa pamatan-on nga hindi mag-sulod sa AFP, kay isa ini ka mersenaryo nga institusyon. Hindi ang pamatan-on magpagamit sa nagahari nga sahi kag magsunod sa mga mando nga kontra sa interes sang pumuluyo. Dapat ang pondo sang AFP nga ginamit lamang sa pagpang harass kag bayolar sa tawhanon na kinamatarung ihalin pakadto sa serbisyo sosyal na ilabi nga kinahanglanon sang pumuluyo.

Wala sa interes sang reaksyonaryo nga gubyerno nga sabton ang kapigaduhon kag pag-antos sang pumuluyo kay sa pagpamigos nga ini sila naga manggaranon kag napatambok. Gani ang ini nga kahimtangan ang nangin rason sang pagkamatarung sang pagrebolusyon! Pamatan-on Baguhon ang sistema nga mapagpamigos kag mapanghimulos! Isulong ang Pungsudnon Demokratiko nga Rebolusyon!