Kunkundenaren ti National Democratic Front -Cagayan Valley (NDF-CV) ti rehimen Marcos iti napeklan a panagpakpakaaso-aso daytoy iti imperyalista a US, iti agtultuloy a panangilako ti soberanya ti pagilyan, iti balbaliw a panang-akomodar iti US-PH Balikatan iti panangiyuna ti US tatta a tawen.

Bayat a ti masa ti Cagayan Valley ken umili a Pilipino ket ad-adda nga agrigrigat iti kumarkaro a krisis gubway ti pimmigsa nga agresyon ti US iti Iran, dagitoy nga ehersisyo a panggubat ket agnanayon nga agpupuor ti langis, agwalwaldas ti pondo ken rekurso ti umili ken mangikabkabil iti pagilyan iti nakaro a peggad a maipisok iti alipugpog ti imperyalista a gera.

Makipaset iti Balikatan tatta a tawen manipud Abril 20 agingga Mayo 8 ti nasurok 17,000 soldado manipud iti United States, Australia, Japan, Canada, France ken New Zealand. Dakdakkel pay ngem kadagiti napalabas nga ehersisyo, iti daytoy a dakkel nga ehersisyo militar tatta ket balbaliw nga agiyaramid da kadagiti live-fire drills kas ti panagpatayab kadagiti missile ken panangpalned kadagiti barko, kasta met ti todo-gera nga ehersisyo iti kadagaan ken kabaybayan.

Daytoy ket maang-angay iti tengnga ti panagpapigsa ti agresyon militar ti US iti Iran ken Middle East ken ti epekto daytoy a krisis iti panagtayok ti presyo ti langis ken presyo dagiti basaran a gagatangen ken serbisyo iti Pilipinas ken intero a lubong.

Gapu iti kinaasideg daytoy iti Taiwan ken istratehiko a heyograpiya a kasayaatan a base iti gubat iti China, intuding ti US ti tallo nga EDCA site iti Cagayan Valley nga adda iti Naval Base Camilo Osias iti Sta. Ana, Cagayan; Cagayan North International Airport iti Lal-lo Cagayan ken iti Camp Melchor de la Cruz iti Gamu, Isabela. Adda met ti base a nabal, sangladan ken helipad iti isla ti Mavulis iti Batanes, ti kamurdongan nga isla ti Pilipinas iti amyanan. Idi 2025, ti pangdadael ti barko a NMESIS (Navy-Marine Expeditionary Ship Interdiction System) missile systems ket inpwesto ti US Marines iti isla ti Batan, a 150-160 kilometro laeng ti kaasideg na iti Taiwan. Kadagitoy, intuding ti US ken AFP ti rehiyon ti Cagayan Valley kas kangrunaan a lokasyon para iti panagsanay militar iti baybay ken kadagiti live fire exercises sa Balikatan.

Kaniwas iti balangkas ti Balikatan kas “napateg nga ehersisyo,” kinapudno na, daytoy ket mangibagbagi ken mangpapauneg laeng iti panagpakpakaaso-aso ti rehimen Marcos iti imperyalismo a US. Inlegalisa ken pinasingkedan dagiti katulagan militar kas ti Mutual Defense Treaty, Visiting Forces Agreemet ken EDCA, ibilbilang ti rehimen US-Marcos daytoy a a Balikatan kas simbolo ti “natibker a kooperasyon” para kano iti “seguridad iti Asia-Pacific region.” Awan ti “Balikatan” wenno “kooperasyon para iti seguridad” iti panangpabus-oy kadagiti gangannaet a bileg a rabngisen ti soberanya tayo iti panangpausar iti teritoryo tayo kas base ti gera nga agresyon da ken panangikabil iti umili iti nakaro a peggad. Daytoy ket bin-ig a panagrukma laeng ni Marcos Jr kas aso-aso ti amo na a ni Trump a mangparparnuay ti imperyalista a gera.

Bayat a nakaturong ti imatang ti rehimen US-Marcos iti Balikatan kas panagsagana iti gera iti Asia-Pacific, ti umili a Pilipino ket sumangsango iti nakaro a krisis kas epekto ti gera nga agresyon ti US iti Iran. Ti kumarkaro a krisis ket indikasyon ti malakolonyal ken malapyudal a sistema iti Pilipinas a makita iti kinaawan daga, atrasado nga agrikultura ken pyudal a panaggundaway, kinaawan ti nailyan nga industriya ken naan-anay a panagsanggir iti importasyon ken gangannaet a panagpuonan, a tuloy-tuloy a mangitentennag iti umili a Pilipino iti nauneg nga abut ti kinakurapay, kinaawan-panggedan ken pagbiagan.

Iti Cagayan Valley, ti dandani triple a panagngato ti presyo ti langis ket nangitunda ti dakkel a panagngato ti presyo dagiti basaran a gagatangen, nga ad-adda a nangitennag iti pagbiagan ti mannalon, mangngalap, drayber, babassit nga aglaklako, mangmangged iti talon ken serbisyo ken iti amin a nakurapay a sektor.

Saanen a kabaelan ti mannalon a gumatang ti krudo a kasapulan da iti panagtalon ken transportasyon ti apit da, ken adun ti nagsardeng nga agmula. Pinakaro pay daytoy ti nakaro a tikag a mangperperdi iti mulmula iti nalawa a kataltalonan kadagiti prubinsya ti Cagayan, Isabela ken Quirino a signipikante a nangkissay ti ani. Natennag met ti sapul dagiti drayber ken babassit nga aglaklako iti 200-300 pesos kada aldaw, ken adu a mangngalap ti saanen a makatapog iti baybay.

Kadagitoy a panawen, ti suporta ti reaksyunaryo a gubyerno kadagiti kakarwan nga apektado a sektor ket palalo nga agkurang ken saan a marikna, isu nga iti esensya ket awan.

Iti panangituloy ti panagsayang iti langis ken nagastos a Balikatan ket maysa manen a napigsa a tungpa iti rupa ti umili a Pilipino a maib-ibusan ti sapul, mailumlumlom iti utang, maaw-awanan ti pagbiagan ken mabisbisinan. Malaksid ditoy, itentennag ti Balikatan ti rehiyon ken intero a pagilyan iti peggad iti panangitransporma kadagiti isla ti Pilipinas kas tay-ak ti gubat para iti imperyalista a dominasyon ti US iti Asia-Pacific.

Ti panangipetteng ti AFP a dagiti ehersisyo a militar ket prayoridad ken ti kasapulan a langis para kadagitoy ket nagatang sakbay pay ti panagatake iti Iran ket ubbaw ken saan a nainkalintegan. Bayat a ti umili a Pilipino ket agsagsagaba, ad-adda nga ik-ikkan pateg ti rehimen Marcos ti panangsursurot iti pagayatan ti amo daytoy nga imperyalista a US. Imbes nga agisayangkat ditoy pagilyan ti ehersisyo a panggubat, ti masa a Pilipino ket ad-adda a nasken nga agsagrap ti pudno nga atensyon para iti pagimbagan da, saan nga iti panangisagmak kadakwada iti imperyalista a gera ti US.

Ti Balikatan ket mangituntunda ti kongkreto a peggad iti mismo a ruangan ti umili ti Cagayan Valley. Idi 2025, ti dakkel a todo-gera nga ehersisyo ken live fire drills ket nangitunda ti nakaro a troma iti bumaryo, nangruna kadagiti ubbing. Kadagiti komunidad ti Aparri ken Batanes, mamati la unay dagiti residente nga adda ti mapasamak a gubat.

Palalo a naapektaran ti pagbiagan ti umili kadagiti komunidad ti Claveria, Aparri, Gattaran, Sto. Niño, Baggao, Lasam, Calayan Island, Sta. Ana ken Batanes. Naperdi dagiti pagay a maani koman ken dagiti nakabilag nga irik ket naitayab gapu kadagiti jetfighter nga agmanmaniobra a nakababbaba. Saan a maasikaso dagiti mannalon dagiti talon ken pasto da. Naparitan dagiti mangngalap a tumapog iti baybay, ken nagtuloyen ti panagkalap, dagiti sigay da ket dinadael dagiti kongkreto a padagsen kadagiti boya a nausar kas target kadagiti live fire.

Ti panagpapigsa iti pwersa a militar ti US iti kaamyanan a paset ti Pilipinas ken ti panangipwesto ti NMESIS missile launcher asideg kadakwada ket mangpangpangato iti tensyon ken probokasyon iti China, ken kangrunaan na, ti nakaro a danag ti umili ti Cagayan ken umili a Pilipino. Iti laksid ti awag iti pagilyan agingga iti internasyunal a komunidad nga ikkaten ti nasao a missile system ken ti base militar da iti Pilipinas, saan nga ikaskaso daytoy ti US ken rehimen Marcos, gapu ta dagitoy ket naigagara a naipwesto tapno papigsaen ti kapabilidad militar ti US tapno pupoken ti China ken ipataw ti panagari na iti Asia-Pacific.

Ti panagpapigsa ti militar ti US, karamanen ti plano iti panangitakder ti pabrika ti armas ken refueling hub iti Pilipinas, ket seryoso a peggad iti seguridad ken soberanya ti pagilyan ken produkto amin ti pannakikunsabos ti korap a rehimen Marcos iti imperyalista a US ken mangikabkabil iti Pilipinas iti kontrol daytoy.

Amin dagitoy ket mangpanpaneknek a ti sistema a panggimong ti Pilipinas ket nairut a saklot ti imperyalismo, pyudalismo ken burukrata kapitalismo, a palalo a rinuker iti kaunggan, a kasapulan a rebbeken ken sukatan babaen ti demokratiko a rebolusyon ti umili.

Isu nga iti laksid ti tuloy-tuloy a panagatake ken red-tagging, minilyon a Pilipino ti pumaspaset ken sumupsuporta iti nailyan demokratiko a rebolusyon, tapno wayawayaan ti pagilyan iti kontrol ti imperyalismo a US ken ti lokal a babaunen da a dadakkel nga apo’t daga, burges kumprador ken burukrata kapitalista.

Nangruna iti Cagayan Valley, nalawag daytoy a karit, nga irupir ti panangpapanaw kadagiti tropa nga Amerikano, kadagiti EDCA site ken dagiti armas da ken gibusan ti Balikatan ken amin dagiti ehersisyo a panggubat da iti rehiyon ken intero a pagilyan.

Bayat a ti rehimen Marcos, ti AFP ken imperyalista a US ket agbalbalikatan iti naranggas a represyon iti umili a tumaktakder para iti wayawaya da, ad-adda pay a palawaen, pairuten ken papigsaen ti panagkakammayet tayo laban iti presensya a militar ti US iti Pilipinas.

Kasapulan nga agpursigi tayo iti panangitakder, panangpapigsa ken panagpalawa kadagiti rebolusyonaryo nga organisasyon ti masa dagiti mannalon, mangmangged, mangngalap, nakurapay iti syudad, katutubo nga umili, kabataan ken estudyante, kababaihan ken dadduma pay a maidadanes a sektor a mangisigurado iti panangisakad iti demokratiko a tignay masa laban iti imperyalismo a US.

Dagiti tao’t simbaan, abogado, empleyado ti gubyerno ken dadduma pay a makintengnga a pwersa ket nasken a nairut a makikammayet kadagiti nakurapay a sektor tapno maitakder ti napigsa nga alyansa a mangduprak kadagiti EDCA site ken mangpasardeng iti dadduma pay nga ehersisyo a panggubat ti US iti Cagayan Valley ken intero a Pilipinas.

Bayat nga agitaktakder tayo ti anti-imperyalista nga alyansa tapno salakniban ti soberanya ti Pilipinas laban iti imperyalista a gera ti US iti amin a paset ti lubong, kangrunaan a bigbigbigen tayo a ti rebolusyonaryo nga armado dangadang iti pagilyan ti kasamayan a pamuspusan iti pananglaban iti imperyalista a gera ti US. Bayat nga ar-aramaten da ti Balikatan tapno iparamag dagiti moderno nga armas da, ipakpakita ti pakasaritaan ti kinapudno ti panangtalmeg ni Mao Zedong, nga ti umili, saan a dagiti banag ti mapangngeddeng iti gubat.

Iti daytoy a takder, al-allukoyen ti NDF-CV ti umili ti Cagayan Valley a dalyasaten ti tugot ti nabanwar a tradisyon tayo iti rebolusyonaryo nga armado a dangadang. Kangrunaan nga uma-awag tayo kadagiti kabataan a sungbatan ti madagdagus a pagkasapulan a labanan ti imperyalista a panagari babaen ti panagkameng iti New People’s Army. Iti panangiyuna ti armado a dangadang, iyabante tayo ti amin a pamuspusan ti dangadang iti sidong ti nailyan demokratiko a rebolusyon tapno rebbeken ti imperyalismo a US ken wayawayaan ti umili a Pilipino.