Nagresulta sang mis-encounter sa tunga sang hanay sang mga pwersa sang 62nd IB ang ila tuyo nga pagreyd sa nakakampo nga yunit sang Leonardo Panaligan Command-New People’s Army (LPC-NPA) sa Sityo Lupo, Barangay Humay-humay, Guihulngan City, Negros Oriental, alas 5:40 sang kaagahon, Mayo 1.

Kontra-opensiba ang ginhimo sang mga Pulang hangaway batok sa nagahara-hara kag desperado nga mga soldado.

Kabutigan ang ginpagwa sang 62nd IB nga apat ka engkwentro ang natabo sa sina nga adlaw. Ang matuod, bangud trigger happy kag uhaw sa dugo ang mga tropa militar sa pagpamuno ni Col. Evelio Ilanga III, natabo ang unang mis-encounter sa alas 4:00 sang hapon, sa tunga lamang sang pasistang tropa sa Sityo Sumilang, Barangay Tacpao, Guihulngan City. Liwat naman natabo ang mis-encounter sa ila hanay, alas 7:00 sang gab-i, sa Sityo Lupo, sa nasambit nga barangay. Nagresulta sa indi magnubo sa 15 ka tropa militar ang kaswalti, suno pa sa mga pumuluyo sa lugar.

Samtang, gindakop kag brutal nga ginpatay sa mga berdugong militar ang pilason nga Pulang hangaway nga si Tony “Ka Pidol” Pahayahay, 62 anyos, sa Sityo Tubod, sa amo gihapon nga barangay, masobra isa ka kilometro halin sa encounter site.

Subongman, isa pa ka Pulang hangaway nga napilasan sa amo nga engkwentro ang gindakop kag gindala sa militar. Tubtob subong, wala pa ini nakita.

Lubos nga ginkundenar sang LPC-NPA ang ini nga mga hinimoan sang 62nd IB nga nagalapas sa laye sang gyera kag sa internasyunal nga makitawhanon nga laye.

Indi man matuod nga may recovery nga mga armas ang militar halin sa NPA magluwas lamang sa mga personal nga mga pagkabutang kag iban pa.

Dugang pa, ginkomiter sa mga pasistang tropa batok sa pumuluyo ang patarasak nga pagpaniro kag pagpinalupok, pagtigayon sang mga tsekpoynts kag curfew sa mga baryo sang Bulado, Tacpao, Binobohan, Humay-humay, Planas kag Imelda; tanan sakop sang Guihulngan City. Nagatuga lamang ini sang kakugmat kag kahadlok sa pumuluyong Guihulnganon.

Nakig-ugyon ang bilog yunit sang LPC-NPA sa pamilya sang Pulang hangaway nga gindala sang militar, sa panawagan nga i-surface ini kag hatagan sang nagakaangay nga due process.

Ginpangabay man sang NPA ang mga pumuluyo sa apektadong lugar nga indi magpadala sang kahadlok kag manindugan para sa tawhanong kinamatarung.