Madinalag-on nga gin-paslaw sang NPA Central Front Panay ang mga katapo sang militar sa idalom sang 12th IB PA paagi sa paglunsar sini sang aktibong depensa. Tuyo tani sang militar nga atakehon ang lugar nga temporaryo ginapahuwayan sang yunit sang NPA apang temprano pa ini nga namutikan sang mga kaupod. Gani, gilayon nga nakapreparar ang mga kaupod kag ginbira ang kaaway antes pa man sila makapalapit sa diin ila man ginkakibot. Bangod sini nagkinarankaran ang mga militar kag patarasak nga nagpinalupok.

Natabu ang nasambit nga pagpang-atake sadtong Hulyo 19, 2025, mga alas-5:30 sang aga, sa bawnderi sang Barangay Artuz kag Barangay Apero nga pareho nga sakop sang banwa sang Tapaz, Capiz. Ang mga yunit sang militar sa idalom sang 3rd ID PA, malawig na nga nagapanglugas kag nagapamahog sa mga pumuluyo sa kabukiran sang Sentral Panay ilabi sa mga binukid nga kabaryohanan sang banwa sang Tapaz Capiz. Kabahin ini sang ila halos wala untat nga Focused Military Operations nga nagatuyo lagson ang Bag-ong Hangaway sang Banwa kag tapuson na ang armado nga kahublagan para madeklarar na sini ang Stable Internal Peace and Security ukon SIPS status sa bilog nga isla sang Panay.

Para tabunan ang kahuy-anan sang ila kapyerdihan sa natabu nga inaway wala huya nga naglubid sang istorya ang 12th IB upod sa 3rd ID sang kuno ila kadalag-an. Daku nga kabutigan ang ginpahayag nila sa midya nga may nakuha sila nga mga mataas nga kalibre sang armas kag iban pa nga kagamitan pangyera sa natabuan sang inaway. Sa pagkamatuod, himo-himo lang sang militar ang litrato nga ginpagwa sa social media asta ang ginapabugal nila nga kuno nakuha nila nga kagamitan. Wala ni isa o anuman nga kagamitan nga nabilin sa bahin sang yunit sang mga kaupod kabaliskaran sa kabutigan nga pahayag sang militar.

Kaparehas man nga ginpabrika nga istorya nga ginpahayag man sa midya para ipakita nga may ila serye nga kadalag-an batok sa NPA. Nag-imbento sila nga may nasulod nga kampo sang NPA sa may Sitio Naatip, Barangay Lahug, Tapaz, Capiz sang nagligad nga Hunyo 16 kag kaangot sini may mga nakuha man kuno sila nga armas kag eksplosibo, madamo nga iban pa nga kagamitan pangyera, mga subersibo nga dokumento kag personal nga gamit sang mga kaupod. Dugang pa gid himo-himo man ang ginpagwa sang 82nd IB nga may nakalkal sila nga mga armas kag iban pa nga kagamitan sang NPA didto sa may Barangay Dalagsaan, Libacao, Aklan.

Desperado ini nga tikang kag tuman ka makatalagam ang pagka-eksperto sa kabutigan sang mga yunit militar sa idalom sang 3rd ID PA nga gusto pagwaon nga may akomplisment report kuno sila sang ila serye nga kadalag-an sa tuyo nga tiplangon ang publiko paagi sa paglubid sang istorya. Sa pagkamatuod wala sang yunit sang NPA sa amo nga tion sa mga nasambit nga lugar kag labaw sa tanan wala man sang kampo ang NPA didto. Athag sa mga pumuluyo sa nasambitan nga lugar ining wala huya nga kabutigan nga pagpabugal nga pahayag militar.

Ining nasambit nga mga malaparan nga operasyon militar sa pagkamatuod nagtuga sang daku nga huol sa malinong nga pagpangabuhi sang mga pumuluyo. Nagtuga man ini sang kahadlok kag pagkahangawa sang ginpunggan sang militar ang mga mangunguma nga magkadto sa ila ulomhan para tani tatapon ang ila mga katamnan kag kasapatan.

Gapanawagan kami sa publiko nga mangin kritikal, mausisa kag indi basta gilayon magpati sa mga binutig nga pahayag militar.

Ang NPA padayon nga nagalunsar sang armadong paghimakas paagi sa malawigan nga inaway banwa para hatagan sang rebolusyonaryong hustisya ang mga biktima sang tanan nga kalakasan militar kag para hayagan nga hublasan ang militar sa ila nga ilusyon nga natigayon nga akomplisment, mga kabutigan kag mga imbentong istorya sini.

Mabuhay ang NPA!