Translation: Pilipino

Ang nabutyag nga modus sa 11th IB nga pagpasurender sa mga sibilyan sa kabukiran pinaagi sa pagpangilad ug pagpanghulga usa usab ka tinubdan sa korapsyon.

Kini ang gipahayag ni Ka Estrella Banagbanag, tigpamaba sa Rachelle Mae Palang Command ( RMPC)-NPA Southeast Negros, human gibalita nga adunay 40 ka milisya sa NPA ang misurender ug nakadawat sa benipisyo pinaagi sa E-CLIP.

“Ang gipagawas nga mga misurender nga NPA mga yanong sibilyan nga nailad sa mga livelihood programs gipatuman ubos sa Community Support Program sa NTF-ELCAC (National Task Force to End Local Communist Armed Conflict) ug mga na-blackmail nga palutsan og warrant o tokhangon sa militar. Daghan sa mga nakadawat sa project walay kalibutan nga naapil na sila lista sa mga misurender,” matud pa ni Banagbanag.

Sumala pa sa gikataho sa media nga nakadawat ang matag usa sa giingong misurender sa balor 10,000 nga cash assistance. Apan ang 2018 nga IRR (Implementing Rules and Regulations) sa E-CLIP (Enhanced Comprehensive Local Integration Program) naglatid nga matag usa sa mosurender modawat sa 50,000 . Buot pasabot moabot kini tanan sa 2,000,000. Ang nahatag sa militar karon moabot lang sa 400,000. Kulang kini sa 1.6 milyon.

Samtang may probisyon usab ang IRR sa E-CLIP nga mohatag sa unit nga mo-costudy sa misurender og 21,000 kada tawo para sa board and lodging. Suma total 840,000 ang nakuha sa militar. Apan wala kini maadto sa giingong milisya kay gipapauli ra man sila sa ilang tagsa-tagsa ka lugar nga giipuy-an.
Sa kinatibuk-an, moabot sa 2,440,000 ang nabulsa sa militar gikan sa peke nga pagpasunder. ###