Ha okasyon han Pandaigdigang Araw ng Kababaihang Anakpawis, ginpapasidunggan han Panrehiyon nga Kumand ha Operasyon han Bagong Hukbong Bayan ha Eastern Visayas an rebolusyunaryo nga kababayin-an nga Pilipino. Nasaludar kami ha maisugon nira nga pagpursige ha dalan han rebolusyunaryo nga pakigbisog, nga amo gud la an maghuhuman ha burgis-pyudal nga kultura nga han sistema nga bagakolonyal ngan malapyudal.

Pinakahitaas nga saludo an ginhahatag naton ha Pula nga mangaraway nga kababayin-an nga ginhalad an bug-os nga kinabuhi ha pagserbe ha katawhan, sugad kanda Wilma Austria (Ka Bagong Tao), Helenita Pardalis (Ka Elay), Maria Norie Cedang Adelantar (Ka Tutri), Delia Rosco Rotamula (Ka Kanay), Ka Kara, ngan Ka Ali. Inalinggawas hira ha mga kahon nga gintalaan han patriyarkal nga katilingban, ngan ginpasulong an pakigbisog agud talwason diri la an mga babaye kundi an ngatanan nga katawhan nga tinalumpigos ngan gintitiyupi. Handumon naton an makolor nga kinabuhi nira ngan han ngatanan nga kababayin-an nga ginpakigbisog an pantay nga katungod ngan katalwasan tikang ha kapitalismo ngan imperyalismo.

An ira militante nga diwa ngan rebolusyunaryo nga optimismo napamana nira ha bag-o nga dugo han rebolusyunaryo nga kababayin-an ha rehiyon. Ha sakob ngan gawas han BHB, padayon nga ginpapakyas han kababayin-an an todo-gerra han rehimen US-Marcos. Gin-aatuhan nira an kampanya nga pagpasurender nga natarget ha mga pamilya ngan kabataan. Maisugon nga ginsasalikway han mga Pula nga mangaraway an buwa nga kamurayawan han programa nga amnestiya.

Hukas ha kasingkasing an pagsuporta nira ha rebolusyunaryo nga pakigbisog tungod kay dinhi, natatagamtaman nira an pantay nga pagtagad ngan nakakapartisipar hira ha pagbabag-o han katilingban, diri sugad ha sistema nga bagakolonyal ngan bagapyudal nga gintatagad hira komo maluya, uripon o epektos.

Samtang natikagrabe an paniniyupi ngan pananalumpigos ha kababayin-an, tikadamo ha ira an naaaghat nga katinan an armas ngan ipasulong an gerra han katawhan. Kinahanglan nira pakusgon ngan pahiluagon pa an ira organisado nga ranggo, ngan sugbungon an mas magbug-at nga responsabilidad agud igdaug an demokratiko nga rebolusyon han katawhan ngan an sosyalista nga konstruksyon ngadto ha pagtapos ha ngatanan nga porma han pananalumpigos.

Kababayin-an, ha rebolusyon an imo lugar! Umapi ha Bagong Hukbong Bayan ngan bag-uhon an katilingban!