Nagausbong ang baho sang korapsyon kag pag-garnatsar sang kwarta sang pumuluyo sang rehimen Marcos Jr sa ginproponer nga P6.352 trilyon nga badyet para sa 2025. Wala konsensya kag wala kaluoy nga ginpasulabi ni Marcos Jr ang pagpasaka sang 51% ukon P419.3 bilyon nga badyet militar samtang ginpangbuhinan ang pundo sang mga ahensya para sa serbisyo sosyal nga direkta magahatag alibyo sa kahimtangan pang-ekonomiya sang pumuluyong Pilipino. Isa na diri ang badyet sang NTF-Elcac nga P7.8 bilyon nga gamiton sa Barangay Development Program (BDP).

Ang BDP amo ang mga proyekto nga ginapatuman sang NTF-Elcac nga tag-10 milyones kada barangay sa ila ginakabig nga mga ‘insurgency free’ nga mga barangay ukon wala na sang presensya sang mga NPA. Apang pareho sang ginbasura na nga ‘pork barrel’ sang mga senador kag kongresista nga napamatud-an nga ila ginabulsa, amo man ini ang kinaiya sang BDP sang NTF-Elcac.

Maathag nga ining kantidad klaro nga indi para sa kauswagan sang mga barangay kundi nagapanguna para sa korapsyon ukon gatasan sang mga matag-as nga opisyal sang militar kag mga lokal nga burukrata. Nahublasan ini sa ginahiwat nga budget hearing sa Kongreso sang ginbuyagyag sang Department of Interior and Local Government (DILG) nga wala pa ni isa sa 885 ka mga proyekto sang BDP sang NTF-Elcac ang na-implementar sang 2024. Ang sa tuig 2021 tubtob 2023 yara pa sa proseso sang implementasyon. Apang sikwahi ini sa ginasiling sang NTF-Elcac nga madamo na sila sang na-implementar.

Halos kalabanan nga mga BDP para badyetan sa 2025 indi man kabahin sang ila gintukoy nga mga insurgency area. Halimbawa sini sa Negros Occidental, makatilingala ang pagbutang sang lima ka barangay (Bagumbayan, Bayabas, Pacol, Palaca, kag Paloma) sa banwa sang Valladolid, nga wala man sang napunting nga presensya sang NPA. Amo man sa Barangay Minoyan, Murcia nga diri nahamtang ang hedkwarters sang 303rd Infantry Brigade. Ang mga nagligad nga tinuig nga ginpatuman nga BDP, ilabi na sa Escalante City kag Isabela nga nangin ila prayoridad wala man sang signipikante nga pagbag-o sa kabuhi sang pumuluyo. Nagaluntad man gihapon ang grabe nga gutom kag kaimolon. Nagapakita lang ini nga ginagamit lang ang BDP para pahabukon ang bulsa sang mga upisyal sang militar kag mga lokal nga burukrata.

Wala nakahatag sang matuod nga kauswagan sa pumuluyo kundi dugang nga perwisyo, kakugmat kag peligro sa kabuhi kag palangabuhian sang pumuluyo ang binilyon nga pondo nga ginbubo para sa NTF-Elcac. Nagakaangay lang nga bungkagon ini.

Ginhimo lang nga rason sang rehimen US-Marcos Jr ang insurhensya kag kagamo sa West Philippine Sea agud mahatagan rason ang pagpangayo sang dako nga pundo sang militar para ila kawkawan. Magluwas sini, nagakahulogan man ini sang mas mapintas kag masingki nga pagpanglagas sang mga mersenaryo nga Armed Forces of the Philippines (AFP) kag Philippine National Police (PNP) sa mga pumuluyo nga magbato sa ila mga patakaran kag pahipuson sila agud wala na sang magpamalabag sa ila kagustohan.

Subongman, ang badyet sang AFP, PNP, NTF-Elcac kag modernisasyon nga programa sang AFP gingamit sa gyera batok sa pumuluyo sa ila pagpangbomba sa kabukiran kag kaumhan, pagsarbeylans, kag iban pa nga mapigoson nga mga hinimoan. Nagabaha man ang mga tropa sang AFP kag PNP sa mga komunidad sang mangunguma ilabi na sa mga lugar nga may mga proyekto sang mga dalagku nga komprador kaangay sang oil palm, kag minahan.

Bangud sini, ang mapintas nga pasismo, korapsyon, kag pagkapapet sa imperyalismong US sang US-Marcos II amo ang magapasagrab sa rebolusyonaryo nga espiritu sang pumuluyo kag magapasingki sang armado nga paghimakas. Napamatud-an na sa masobra lima ka dekada nga ang NPA amo ang matuod nga hangaway sang pumuluyo kag matuod nga nagapangapin sa interes sang sahing ginapigos kag ginahimuslan.