Sini nga semana lang nagpagwa sang pahayag ang Philippine National Police (PNP) Himamaylan City, Negros Occidental paagi kay PLt. Col. Reynante Jomocan nga may isa ka kaso sang rape sa isa ka menor de edad ang ila natala sa Barangay Carabalan, Himamaylan City kon sa diin gin-alegar nga imbolbado ang armadong grupo nga suspek sa pagmasaker sa pamilya Fausto sang tinalikdan nga Hunyo 14 sini nga tuig. Bisan pa wala ginhambal ang “New People’s Army (NPA)” kag ginpaliko-liko pa ang istorya, klaro nga gusto naman ipahid sang Armed Forces of the Philippines (AFP)-PNP ang ini nga kahimoan sa rebolusyonaryong hukbo nga NPA.

Ang matuod, antes pa man ini ginpagwa sang PNP, daan na ini nga gin-imbestigahan sang isa ka yunit sang Mount Cansermon Command (MCC-NPA) bangud sa ginpasaka nga reklamo halin sa pamilya sang biktima.

Suno sa pasiuna nga imbestigasyon sang mga Pulang hangaway, natabo ang pagpang-rape sa panahon nga nagapatigayon sang Retooled Community Support Program (RCSP) ang yunit sang 94th IB Charlie Company nga nakabase sa Barangay Mahalang, katambi sang Barangay Carabalan. Halin Hulyo 25 tubtob Setyembre ang pagkampo sa nasambit nga militar sa simbahan kag kabalayan sa Sityo Cunalom-Lunoy tanan sakop sa Barangay Carabalan kon sa diin ginmilitarisa ang lugar.

Narekord ang pagpangdakop sang duha ka tigulang, pagpangastigo sa anum ka mga mangunguma, pagpamahug kag ang pagpatalang nga gintawag sa 94th IB nga “loud speaker operations.”

Para mahinabunan ang amo nga mga kalakasan kag madula ang kaakig sa pumuluyo sa ila ginhimo nga pagpanglapas, nagpatigayon sang liga sang basketball kag bayle ang mga soldado sang 94th IB sa Sityo Cunalom-Lunoy. Ginhaylo nila ang mga kabataan para mangin malapit sa ila kag para kuno indi mapatalang sang mga NPA.

Mga ulihi nga semana sang Agosto sang nagpabayle ang mga militar, nasaksihan sang mga pumuluyo nga may duha ka babaye nga isa ka dalagita (15 anyos) kag ang isa naman ang ginbulubanta nga ara sa 18-21 ang edad ang ginpalapitan sang lima ka lalaki nga nakasibilyan nga katapo sang 94th IB sa malapit sa may entrance sang ila ginbaylehan kag pilit nga gina-uyatan ang kamot sa mga babaye para mag-upod sa ila. Nakilala sa pumuluyo ang lima ka lalaki nga katapo sang 94th bangud upod ini sila sa nagpatigayon sang RCSP sa ila lugar.

Pagkabwas, naglapnag na sa bilog sityo kag mga katambi sini nga sityo ang natabo sa dalaga. Suno pa sa mga pamilya sang biktima nga ginpapauli ang dalaga samtang ginsuksukan sang uniporme sang militar matapos ang pagpanglugos. Padayon pa nga gina-imbestagahan ang ini nga kaso sang yunit sang MCC-NPA kag ginpakamaayo nga gintago ang mga identidad sa biktima para sa ila dignidad kag seguridad.

Isa lang ka adlaw matapos sa natabo, bangud sa kahuy-anan kag indi mapunggan ang paglapta sang istorya, gulpi nga nagpull-out ang yunit sang RCSP sang 94th IB sa amo nga lugar kag masobra semana na liwat nga nagbalik.

Ini nga insidente ang dugang naman nga kaso sang mga pagpanglapas sang militar, partikular ang 94th IB nga kilala nga kriminal nga imbolbado sang pagpamatay, pagpangastigo, pagpangdakop kag iban nga makasiligni kag indi makitawhanon nga kahimoan.

Ang wala basehan nga mga pahayag kag akusasyon sang PNP Himamaylan City batok sa NPA ang nagapakita lamang sang ila kadesperado nga wasakon kag mahigkoan ang dungog sang NPA. Kaangay sang ila himo-himo nga pagpasaka sang kaso sadtong Setyembre 1 batok sa pipila ka indibidwal nga ginpasibangdan katapo sang NPA kag suspek sa masaker sa pamilya Fausto bisan wala permiso sang nabilin nga pamilya sang biktima. Kabaliskaran sa mga pahayag sang pamilya sang biktima nga para sa ila ang matuod nga may kahimoan sa pagmasaker amo ang AFP-PNP.

Mas ginapabaho pa sa PNP kag AFP ang ila daan na nga garok nga kredibilidad paagi sang paghimo-himo sang mga pahayag sa katuyoan nga wasakon ang NPA.

Ginahangkat sang MCC-NPA ang LGU-Himamaylan City nga mabuligan ang mga mangunguma nga mga biktima sang wala untat nga mga kalapasan sa amo nga lugar.

Ginapangabay man sang MCC-NPA ang pumuluyo partikular sa lugar nga militarisado kag puno sang mga pagpanglapas sang AFP-PNP nga dapat mag-ugyon, manindugan kag kolektibong magbato para madepensahan ang ila pangabuhian kag komunidad.

Ginapangayo ang lubos nga suporta sang pumuluyo kag bulig sa imbestigasyon sa mga kaso kaangay sang pagpamatay kag rape para mapasabat ang kriminal nga 94th IB nga padayon nga nagahalit sa ila lugar.

Kadungan sini, himuon sang MCC-NPA nga mapasabat ang kriminal nga AFP-PNP/NTF-Elcac ilabi na ang 94th IB. Maglunsar ang mga yunit sang Pulang hangaway sang mga taktikal nga opensiba nga makapahuyang sa kaaway kag makakumpiska sa ila armas nga gamiton sa paglab-ot sang hustisya kag pagsulong sa handum sang pumuluyo.###