Translation: English

Karon nga adlaw, Disyembre 10, 2020, duyog ang National Democratic Front of the Philippines sa NorthEastern Mindanao Region (NDFP-NEMR) sa katawhan sa tibuok kalibutan sa pagsaulog sa ika-72 tuig sa United Nations’ Universal Declaration of Human Rights (UN-UDHR). Sa atong pagsaulog sa UN-UDHR, atong hatagan og taas nga pasidungog ang tanang Pilipino nga naghalad sa ilang kinabuhi ngadto sa pakigbisog alang sa tawhanong katungod. Sa samang higayon, saludohan nato ang mga tigpanalipod sa tawhanong katungod nga padayong nakigbisog alang sa tawhanong katungod bisan pa brutal nga giatake, nga walay pagpanubag, sa pasistang rehimeng US-Duterte.

Hilabihan nga gilapas nga walay pagpanubag ang tawhanong katungod sa Pilipinas sa pasista, nangandoy nga diktador nga si Duterte ug iyang mga alipures. Nisamot pa kini samtang nabutyag ang grabeng palpak nga pag-atubang sa pandemik ug nagkadaghan ang katawhang nagsaway sa dili sakto, walay direksyon ug taphaw nga paningkamot sa iyang administrasyon sa pag-atubang sa pandemik. Sa paggrabe sa pagka-inutil ni Duterte, nigrabe usab ang iyang pasismo diin ang iyang gobyerno ginaatake ug ginganlang mga terorista ug simpleng mga “dilawan” kadtong mga nagpadayag sa ilang mga pagsaway, apil mga sugyot, aron lamang isalikway ang ilang mahinungdanong mga punto.

Ang Pilipinas gipadagan sa militar diin ang morag-hubog, naapektuhan na sa druga ug tataw nga masakitong si Duterte tawotawo na lamang nila. Importanteng mga tawo sa gabinete ni Duterte and mga kanhing heneral, naghawid sila og mahinungdanong mga ahensya sa gobyerno sama kang Gen. Delfin Lorenzana sa DND, Gen. Eduardo Ano sa DILG, Gen. Hermogenes Esperon sa NSC, Gen. Roy Cimatu sa DENR, Gen. Rolando Bautista sa DSWD, Carlito Galvez, Jr. sa OPAPP, Eduardo del Rosario sa DHSUD (housing department), Gregorio Honasan sa DICT ug Danilo Lim sa MMDA.

Ang mga ahensya sa gobyerno nga gipadagan sa maong mga heneral naghakop sa pinakadakung bahin sa badyet ug ang mga programa niini nakatutok sa kontra-insurhensya bisan pa man og gipagarpar niini nga padulong na sa pagkapukan ang BHB. Ang NTF-ELCAC ni Duterte naila na karon nga “pork barrel sa mga heneral” ilabina kay nakatakda kining modawat og 16 bilyones nga badyet alang sa 2021 taliwala sa Covid19 ug daghang nakadaut nga natural nga mga kalamidad. Minilyon na usab ang ibulsa sa mga heneral ug pondo alang sa paggukod sa taga-midya, naglihok alang sa tawhanong katungod, mga progresibo ug mga sibilyan, apil na ang mga artista, nga gi-red nga BHB ug mga terorista aron mahata’g rason ang paggamit nila sa dakung bahin sa pondo bisan pa man og adunay mas dakung panginahanglan niini alang sa CoViD 19 ug rehabilitasyon sa naguba sa kalamidad nga mga probinsya.

Samtang ang militar nagpadagan sa iyang gobyerno, si Duterte walay basehan nga nag-akusar, nagpahamtang ug gidaut ang iyang mga kritiko, sama sa usa ka malditong maru nga bata nga nagpakanang gidaugdaug.

Brutal nga pagpanglapas sa tawhanong katungod ang gipahamtang sa gobyernong Duterte sa katawhan sa Caraga nga gibubuoan niini sa 3 ka brigada ug 9 ka batalyon sa AFP, gipadaghan ang kapulisan sa PNP ug naggamit og mga armadong kriminal nga mga paramilitar.

Nagkampo ang militar ug naglunsad sa brutal nga operisyon sa kabukiran ug mga komunidad sa mga mag-uuma sa Caraga taliwala sa CoVid19 pandemic. Niini lamang nga tuig, 7 ka sibilyan ang biktima sa extra judicial killings, nga gihimo sa military assets nga riding in tandem o sa militar/pulis mismo. Ilang gipatay bisan ang mga tigulang nga sibilyan sama sa 78 pangidaron nga si Rolando Leyson Sr., tungod lamang kay adunay anak o ig-agaw nga membro sa BHB, gipasanginlan nga nisukol, gibutangan og mga armas ug eksplosibo ang mga balay. Wala pa matagbaw, ila pang gibaharan ug gihasi ang mga membro sa pamilya sa mga biktima.

Ubos sa CoVid19 pandemik, dul-an sa 300 ka pamilya ang pugos nga nadislokar sa 7 ka komunidad ug daghang kabataan ug katigulangan ang natruma sa 6 ka pagpamomba sa mga umahan ug duol sa kabalayan. Gipasamot pa nila pagbutang sa kakuyaw ang kabatan-onan sa pataka nga pagpaarak sa mga tropa sa AFP sa kabalayan sa mga sibilyan sama sa nahitabo sa Lianga, Surigao del Sur diin usa ka 5 ang pangidaron nga bata ang naigo sa shrapnel niadtong Pebrero ug sa San Agustin, Surigao del Sur diin hapit maigo sa bala ang 6 ug 7 pangidaron nga mga bata niadtong Oktubre. Gilapas nila ang katungod sa edukasyon sa kabatan-onang Lumad sa pugos nga pagsira sa mga eskwelahang Lumad nga gitukod sa singot ug dugo sa katawhang Lumad.

Gihimong gatasan ang mga sibilyan sa militarisadong mga komunidad sa mga opisyal sa militar nga naghuthot og dinagku gikan sa “government assistance” sa “NPA surrenderees” ug mga proyektong alang sa “NPA cleared communities.” Gipugos nila ang mga sibilyan sa mga komunidad ug membro/lider sa mga progresibong organisasyon nga mosurender isip BHB, gibalikbalik ang mga gipasurender ug gihuthot ang mas dakung bahin sa pondo nga alang kanila. Mao nga, aron makakuha og mas daku pang kwarta, ilang gitaho nga gatusan kundili man liboan, na ang nagsurender bisan pa man gipagarpar na niini nga ang pwersa sa BHB sa NEMR nikunhod na sa 300 na lang ka manggugubat sa pagsugod paglingkod ni Duterte.

Ang mga tigpanalipod sa tawhanong katungod sa NorthEastern Mindanao Region brutal nga giatake sa AFP/PNP. Tulo (3) ka mga progresibo na ang gipatay sa Caraga niini nga tuig apil na ang tigulang nga si Nora Apique, usa ka lider-mag-uuma nga brutal nga gipatay niadtong Marso 31 sa San Miguel, Surigao del Sur. Gipasakahan nila og 26 ka tinumotumong mga kaso lambigit sa mga aksyon sa BHB ang kapin 200 ka mga progresibo ug membro sa maki-tawhanong grupo, gipadakop ug gipriso ang pipila kanila.

Gi-red-tag nila ang susamang mga tawo, gi-post sa militar ug sa ilang mga asset ug ginganlan sila nga BHB ug mga terorista/komunista, sa social media ug nangbitay og mga tarpaulin sa mga dagway. Kanunay silang gisubaybayan, gibahadan ug gihasi.

Gihimo kining tanan sa rehimeng Duterte aron pahilumon kadtong mga nagbutyag ug nitabang sa mga biktima sa pagpanglapas sa tawhanong katungod, ilabina kadtong nagbutyag sa dislokasyon sa mga komunidad tungod sa pagpamomba ug pagpanglapas sa tawhanong katungod aron makawkaw ang natural nga bahandi sa Caraga sa mga dagkung minahan ug plantasyon.

Gilapas sa AFP/PNP ang balaod sa gubat, gipatay ang mga membro sa BHB nga wala na sila hatagi og higayon nga mosurender, gipatay bisan kadtong dili armado sama sa nahitabo sa dili armado nga medik nga si Ka Reb. Dugang pa nilang gipanamastamasan ang patay’ng lawas ni Ka Reb sa ilang pag-posing sa iyang lawas ug pagkuha og hulagway uban niini nga sama sa tropeo.

Taliwala niining mga atake, ang NDFP-NEMR nanawagan sa mga nag-adbokasiya sa tawhanong katungod nga magmalig-on, padayon nga pakigbisogan ang tawhanong katungod. Dili karon ang panahon nga magpakahilom. Sa pagsamot sa paghagip-ot sa demokratikong espasyo sa pasistang si Duterte ug iyang alipures, makig-uban kanamo sa paglunsad og rebolusyon. Sampa sa Bagong Hukbong Bayan ug mag-uban kita sa pakigbisog alang sa tawhanong katungod!