NAINGET A SUPSUPYATEN KEN KUNKUNDENAREN ti National Democratic Front of the Philippines –Ilocos ti plano ti imperyalista a US ken ti rehimen Marcos nga angayen ti 38th Philippines-United States Balikatan Exercise iti prubinsiya ti Ilocos Norte inton Abril 24-27 2023. Maikadwa a joint exercise daytoy a maangay iti Ilocos Norte kalpasan ti umuna a joint exercises ti Philippine Marines ken US Marines a naiyaramid idiay Currimao ken Laoag City idi Hunyo 2022. Dagitoy nga ehersisyo militar ket mangipeggad kadagiti umili nga agindeg iti nasao a lugar ken mangbaddek iti soberanya ti Pilipinas.

Kas inpalgak ni Col. Michael Logico a mangidaulo ti 38th Balikatan Exercises, immunan a naituding ti barangay Bayog, munisipalidad ti Burgos kas “operational area” ti maangay nga ehersisyo inton Abril 24-27. Ti igid ti baybay ti Bayog ket maaramat kas coastal air defense site iti ehersisyo, nu sadinno a maisayangkat ti live fire exercises tapno ipadas dagiti baro a ramit a panggubat ti US.

Nagpakada ti US Armed Forces ken pinalubosan ni Presidente Marcos, Gobernador Matthew Marcos ken ti Sangguniang Panlalawigan ti Ilocos Norte ti nasao a plano nga ehersisyo, ngem saan da nga inyuman ken innala ti pammalubos dagiti residente iti lugar a pakaisayangkatan ti aktibidad-militar. Daytoy ket iti laksid nga ipakpakdaar dagiti trainor dagiti peggad nga itunda ti nasao nga ehersisyo karaman ti posible a madadael a coral reefs iti kabaybayan ti lugar.

Kangrunaan a kunkundenaren ti NDF-Ilocos ti imperyalista a US ken ti pannakikumplot ni Presidente Marcos, ti AFP ken Department of National Defense tapno maisayangkat ti nasao nga ehersisyo militar a pakapeggadan dagiti umili iti Burgos ken dagiti komunidad ti Ilocos Norte a saklawen ti ehersisyo.

Iti napalabas a 37 a tawen, maang-angay ti US-RP Balikatan Exercises wenno panangsanay ti US Armed Forces ti Armed Forces of the Philippines tapno papigsaen ti depensa ti imperyalista a US laban kadagiti karibal na nga imperyalista a bileg. Ti US-RP Balikatan Exercises ket lalaunen ti Enhanced Defense Cooperation Agreement (EDCA) ken Mutual Defense Treaty iti baet ti Pilipinas ken US. Daytoy a Balikatan Exercises ita a tawen a maangay iti Ilocos Norte, kasta met iti Fuga, Calayan ken Batanes ket maysa kadagiti kadakkelan a pagsasanay nga isayangkat ti US iti Pilipinas a pakairamanan ti 16,000 a puersa ti AFP ken US Armed Forces.

Manarimaan met ti panagrikrikus ni US Defense Secretary Lloyd Austin III iti nadumaduma a pagilyan iti Asia tapno ipatungpal ti plano da nga itakder dagiti EDCA sites. Dagiti EDCA sites ket dagiti lokasyon nga intuding ti US a pangipasdekan kadagiti base ken pasilidad militar na. Kanaig daytoy, makipagkaykaysa met ti NDF-Ilocos iti panangkondenar ti umili a Pilipino iti iyuumay ni Austin iti Pilipinas ken ti pannakitulag ni DND Secretary Carlito Galvez tapno kumpletuen ti lima nga EDCA sites iti Pilipinas ken nayunan pay daytoy ti uppat. Pudno la unay nga babaen ti panangipasdek kadagiti EDCA sites, agbalin ti Pilipinas nga staging ground ti gubat nga agresyon ti imperyalista a US ken magneto kadagiti atake dagiti kalaban na kas ti Russia ken China.

Inbulgar mismo ni Gen. James Bierman, ti commanding general ti US Armed Forces’ Third Marine Expeditionary Force and Marine Forces Japan a ti US ket nabayagen nga agsagsagana iti entablado para iti gubat laban iti China iti paset ti Asia-Pacific. Silalastog nga inpug-aw ni Bierman nga isagsagana na ti teatro ti gubat iti Pilipinas ken Japan kas ti inaramid da a panangisagana da iti Ukraine tapno gubaten ti Russia. Sakbay a pinabettak da ti gubat idiay Ukraine, sinanay ti US dagiti soldado ken umili a Ukranian. Isu a ti mapaspasamak a gubat idiay Ukraine ita ket gubat ti US ken dadduma pay nga kaalyado na nga imperyalista iti North Atlantic Treaty Organization kontra iti Russia tapno agawen ti kinabaknang ken rekursos ti Ukraine ken dominasyon iti ekonomiya iti Eastern Europe .

Dagiti isaysayangkat ti US a military exercises iti agdama ket paset ti Indo-Pacific Military Strategy ti Pentagon wenno US Defense Department tapno kubongen ken atakaren ti China a mangidurduron met iti superyoridad na iti Asia babaen ti panangipatakder na kadagiti pasilidad militar iti West Philippine Sea tapno kupikupan ti nasao a teritoryo ken dagiti natural a rekursos ditoy. Pilit met a rabrabsuten ti US daytoy a a superyoridad militar ti China.

Kaniwas ti iyal-allilaw ni Col. Logico a ti maaramid a military training ket saan a probokasyon, ti maisayangkat a live fire exercises idiay Burgos, Ilocos Norte inton Abril ket nalawag a maysa manen a probokasyon ti US laban iti China a mangipagpaganetget iti One China Policy wenno ti soberanya ti Taiwan laban iti panangdominar ti US.

Pappapigsaen ti imperyalista a US ti bileg militar na tapno patibkeren ti hegemonya na iti ekonomiya iti Asya-Pasipiko. Daytoy ti gapu na nu apay nga insayangkat ni US Pres. Joseph Biden ti taripnong dagiti 14 a pagilyan para iti Indo-Pacific Economic Framework for Prosperity (IPEFP) idi Disyembre 2022 tapno lapdan ti dominasyon ti imperyalista a China iti negosyo, linnakuan ken panangkontrol iti rekurso iti nasao a rehiyon.

Ania ti rason a makisilpo ti Pilipinas iti US para iti mutual defense kontra iti China, idinto a parehas a gayyem ti rehimen Marcos ti dua nga imperyalista a pagilyan? Iti pannakialyado ti rehimen Marcos iti US para iti mutual defense, traytraydoren na met laeng ti China, isu nga agbalbalin met laeng ti Pilipinas a target ti atake ti China. Ti nalawag, maip-ipit ti Pilipinas iti dua nga agtimtim-og a bato – ti parehas nga imperyalista a US ken China. Ken ti nalawlawag pay, saan a pudno nga ibilbilang ti US ti Pilipinas kas nasinged a gayyem na, nu di ket piyon iti gubat na tapno pagtalinaeden ti hegemonya wenno panagari na iti sangalubongan.

Ti mapasamak a live fire exercises idiay Bayog, Burgos Ilocos Norte inton Abril ket napeggad kadagiti komunidad ti manggalap ken mannalon nga agindeg sadiay. Sumangsango da iti risgo a mapuntaan iti live firing iti panawen ti ehersisyo. Iti pannakaituding ti Bayog kas coastal air defense ken operational area iti nasao a Balikatan Exercises, nalawag nga isagsagana da daytoy nga stage area ti imperyalista a gubat ti US laban iti China, isu a saan nga adayo a mapasamak ditoy Pilipinas ti gubat a kas ti mapaspasamak a gubat idiay Ukraine, ken agbalin ti Burgos, Ilocos Norte a war front.

Siguden a kunkundenaren ti umili nga Ilokano ti panangbastos ti China iti soberanya ti Pilipinas iti panagari-ari na iti West Philippine Sea tapno kamkamen ti natural a gamgameng ditoy a rumbeng nga agpaay iti umili a Pilipino. Kagiddan na, saan a rumbeng nga ipalubos da a maaramat ti Ilocos kas stage area ti gubat ti US kontra iti China. Daytoy ket nalawag a panangirubo ti imperyalista a US iti Pilipinas ken panangiluges iti soberanya ken teritoryal nga integridad na.

Al-allukoyen ti NDF-Ilocos dagiti umili nga Ilokano nga ilaban ti seguridad da kontra iti Balikatan Exercises 2023 iti Ilocos Norte. Rumbeng a makipagkaykaysa da iti umili a Pilipino iti pananglaban iti gubat nga agresyon ken probokasyon ti imperyalista a US iti panggep na a bukodan ti ekonomiya ti sangalubongan. Rumbeng a makipagkaykaysa da iti dangadang ti umili a Pilipino para iti soberanya, wayawaya ken pudno a talinaay ken kappia.#