Nagahatag sang taas-kamao nga pagpasidungog ang mga pulang hangaway sang Romeo Nanta Command-NPA kag bug-os nga rebolusyonaryong pwersa sa South Central Negros kay Rubin “Ka Marcos” Tingal nga naghalad sang iya kabuhi para pangapinan ang interes sang malapad nga masa.

Napatay si Ka Marcos sadtong aga sa Disyembre 2, 2025 sa engkwentro sa tunga sang isa ka yunit sa RNC-NPA kag sa mga pasistang 94th IB nga naga-opereyt sa Sitio Cabagal, Barangay Buenavista, Himamaylan City. Ara sila sa komunidad para magtungod sa mga rebolusyonaryong hilikuton lakip na ang paghatag sang bulig sa mga biktima sang Bagyong Tino.

Nagdesisyon nga magpultaym sa Hukbo si Ka Marcos sadtong tunga-tunga nga bahin sang 2023 matapos ang pagpatay sang pasistang militar sang iya utod nga si Crispin Tingal Jr., isa man ka mangunguma, samtang nagapuli sa ila balay matapos magtambong sang isa ka seminar sa mga mangunguma sa Kabankalan city. Madumduman nga antes sini, pila na ka beses nga ginransak ang panimalay sa mga mag-utod nga Tingal bangud sa akusasyon nga nagasuporta ini sa NPA.

Matapos ang pila ka bulan nga dalagan sang kaso nga wala gihapon maangkon ang hustisya nga ginapangita sa ila pamilya kag padayon gihapon nga nagapangharas ang militar sa ila, nakita ni Ka Marcos ang kakinahanglanon nga magsulod sang hukbo para mapasabat ang mga kriminal nga nagapanghalit sa mga mangunguma nga amo ang AFP kag para man mahatagan sang hustisya ang kaangay man nila nga biktima sang kalakasan sang reaksyonaryong armado. Mas nagbakod pa gid ang iya panindugan kag karesolbado sang nakita niya ang matuod nga dagway sang makasahing paghimakas.

Naghalin si Ka Marcos sa sahing mangunguma nga may impluwensiya sang lumpen, kag nakatapos sang ‘highschool’. Isa siya ka maalamon nga pamatan-on kag dasig ini magkat-on sang mga hilikutan ilabina sa patag sang iya interes, partikular na sa medikal. Madamo nga mga masa ang nagpalangga kay Ka Marcos bangud gingamit niya ang iya abilidad sa pag-alagad sang masang ginapigos kag ginahimuslan.

Nagtungod sang lain-lain nga katungdanan si Ka Marcos sa sulod sang yunit. Nangin opisyal ini sang pinansya kag lohistika, giyang pulitika, opisyal sa medikal, kag isa ka tim lider. Dugang diri, nagserbe siya nga instruktor sa mga kaupod sa literasiya kag numerasiya (LitNum). Tutum man siya kag maayo sang mga rebolusyonaryong hilikuton nga iya gintungdan.

Sa masobra duha ka tuig, wala nalimita sa pagtimalos ang pamensaron ni Ka Marcos kundi mas nakita niya nga ang pagsulod sang armado sang pumuluyo, labina sa kaangay niya nga pamatan-on, ang may dako nga papel para sa pag-angkon sang hustisya sosyal, matuod nga kahilwayan kag pagbag-o sa aton sosyedad. Nag-alagad siya sang pumuluyo sang puno sang kapagsik kag wala sang pagpangduhaduha tubtob sa ulihi niya nga ginhawa.