Mahugot nga ginpapapahimuwaan ngan ginkukundenar san rebolusyunaryo nga organisasyon san mga parag-uma sa Northern Samar an pahayag ni 8th Infantry Division chief Maj. Gen. Ariel Orio nga mga kaapi han Bagong Hukbong Bayan an tulo nga parag-uma nga ginmasaker san iya mga pasista nga tropa sa Catubig sin diri pala maiha.

Sira Noel Lebico Sr san Barangay Roxas, Catubig; Arnel Aquino san Barangay Osmeña, Palapag; ngan Nonoy Norcio san Barangay Luneta, Gamay, ngatanan mga ordinaryo nga parag-uma. Maiha na nga target sira nga tulo san brutal nga kampanya san pagpapasurender san pasista nga militar. An mga baryo ngan bungto nga kanra gin-eestaran nakapailarum sa diri-deklarado nga balaud militar tikang pa san 2020.

An kamatuoran, ordinaryo nga parag-lukad si Lebico Sr; tungod la kay pirme natukad para magpakabuhi gin-akusaran na siya nga may sumpay sa BHB. Si Aquino naman sadto na nga iligal nga gindakop san 20th IB sadton 2017. Amo gihapon nga batalyon an duha kabeses nga nangistraping sa iya sadton 2020 ngan 2023.

Kaupod an iya mga kampon sa 8th ID, waray kaawod nga ginbibirikis ni Orio an kamatuoran nga mga parag-uma an kanra ginpatay. Gin-uutro la niya an lunod-patay nga linya nga “inato” o “armado” an tulo. An kamatuoran, ginpatay sira san mga sundalo tungod kay ginsasalikway nira an pinugos nga pagpapasurender san 8th ID, nga nangangaruyag sidngon san pagtutdo ngan pagtraydor sa ira mga kahimaryo. Nahahakog gud sira Orio nga mahakin an “pahalipay” sa “pagnyutralisa” sa mga gin-aakusaran nga kaapi san BHB, sanglit estilo nga Tokhang an ginhahasog sa kampanya nga kontra-insurhensiya.

Duro liwat namon nga ginkukundenar an panhadlok ni Orio sa menor de edad ngan pudo nga anak ni Lebico Sr. Sa butnga san iya kasubo, ginmanipula pa nira ini agud pakarauton an iya amay nga sira mismo an nagpatay. Diri na ini urusahon tungod kay mga sundalo liwat an nangistraping ngan nagpatay sa duha nga menor de edad sa Barangay Roxas sadton 2022.

Hul-os kami nga naduyog sa kasubo sa mga paryentes ngan sangkay nira Lebico, Aquino ngan Norcio. Waray katupong an suol nga naaabat niyo yana; segurado ginpapagrabe pa ini san mga hilo nga ginyiyinawyaw san militar.

Gin-aaghat namon kamo ngan an igkasi namon parag-uma nga kundenaron an masaker sa Catubig ngan pahimuwaan an ginsesering san 8th ID. Labaw san-o pa man kinahanglan naton magkaurusa kontra sa paghahadi san militar. Tubtub nga naghahadi sira sa aton mga baryo, mag-uuru-utro la an brutal nga panmatay san aton igkasi parag-uma, an mga pakuri nga “lockdown” ngan pagtamas-tamas sa aton mga katungod. Sa pag-ato makakab-ot naton an tinuod nga hustisya para sa aton mga hinigugma nga gin-agaw sa aton san pasista nga militar.

Sa butnga san natikagrabe nga pasista nga terorismo, utro kami nga nananawagan sa mga grupo sa tawhanon nga katungod, midya, mga tawo sa singbahan, estudyante ngan lokal nga upisyal nga makig-usa sa mga parag-uma san Northern Samar nga ibuksas an mga abuso militar ngan ipanawagan an pagpapalayas sa mga sundalo sa amon mga baryo. Aliskayon an kamatuoran sa luyo san mga buwa san 8th ID, depensahan ngan gumapil sa masa nga tinalumpigos.