Mabaskog nga ginakondenar sang Leonardo Panaligan Command-New People’s Army (LPC-NPA) ang pilit nga pagransak sang pasistang 62nd IB sa puluy-an ni Tacio Rayna, mangunguma, may asawa kag kabataan sang Sityo Tayubong, Barangay Puso, La Castellana, Negros Occidental sadtong Disyembre 23 alas 12:00 sang gab-i. Ginpang-ukay ang ila mga kagamitan sa sulod sang puluy-an kag gintamnan sang .45 cal pistol, magasin kag mga bala. Desperado man nga gindala sang nasambit nga tropa militar si Allan Paul Rayna, pamatan-on kag legal ang pangedaron. Asta subong wala pa makita sang pamilya si Allan Paul. Dako ang kabalaka sang pamilya Rayna sa pagkadula sang ila anak.

Wala sang NPA sa lugar. Wala huya kag kabutigan ang palayag sang militar sa insidente. Pasulit-sulit, scripted kag cover-up ang ginpaggwa nga engkwentro sang militar sa tunga sang NPA kag tropa sang 62nd IB sa lugar.

Ang matuod, tuig 2019 pa nga ginabalik-balik kag ginaperwisyo sang pasistang militar ang pamilya Rayna. Masami ginapahug kag ginapasibangdan nga NPA supporter ang pamilya Rayna sa nasambit nga lugar. Desperado kag paslaw ang paglagas sang pasistang militar sa CPP-NPA kag lunsay mga sibilyan ang ila masami nga ginapa-ukpan, pilit nga ginapasurender, ginapasibangdan nga supporter sang NPA, iligal nga ginasampaan sang hinimu-himo nga kaso kriminal, ginakastigo, masaker tubtob pwersa nga ginapamatay.

Nadumduman sadtong Disyembre 6, brutal nga Ginpatay sang berdugong 62nd IB sa Braulio” Bunny” Tubalado sang Sityo Karanawan, Barangay Amontay, Binalbagan, Negros Occidental.

Mangunguma mag-isa! Hublasan ang mga kabutigan sang pasistang 62nd IB sa Central Negros!