Mabaskog nga ginapakamalaot sang Leonardo Panaligan Command-New People’s Army (LPC-NPA) ang lapnagon nga pagpang-abuso sang berdugong tropa sang 62nd IB sa pagpamuno ni Lt.Col Evelio Ilanga III sa mga mangunguma sa Central Negros.

Sadtong Marso 15, 2024 alas 9:18 sang gab-i, natublag ang mahamuok nga katulugon sang mag-asawa nga sanday Maribel kag Randy Pecore sang Barangay Tala-on, La Libertad, Negros Oriental sang ginpaarakan ang ila panimalay sang platun nga tropa sang pasistang 62nd IB. Pagkaaga Marso 16, ginbantala naman sang militar nga engkwentro sa tunga sang NPA kag nasambit nga tropa militar.

Ang matuod wala sang yunit sang NPA sa lugar. Wala man sang kamatuoran nga may shotgun nga nakumpiska ang militar. Ini lunsay mga kabutigan kag gusto lang sang 62nd IB nga hinabunan ang ila palpak nga operasyon.

Ginakondenar man sang LPC-NPA ang paglusob sang militar sa panimalay Cantela sang sityo Pitik-pitik, Brgy Luz, Guihulngan sadtong Marso 20, 2024 alas 6:00 sang aga. Ginsaka, ginransak, gin-ukay ang mga kagamitan, gintamnan sang .357 caliber pistol kag Engram ang nasambit nga panimalay kag iligal nga gin-aresto si Ronald Cantela. Si Cantela ang tumandok nga mangunguma kag sibilyan sa lugar.

Ang kapintas nga ginahimo sang 62nd IB sa pumuluyo sang Central Negros ang indi na bag-o kundi tatak na sang nasambit nga batalyon ang berdugo kag pasista sa balayon sang pasismo kag terorismo sang estado.

Samtang ginabuyagyag sang pumuluyo sa mga kaumhan sang Central Negros ang kalakasan militar, ang NPA magalunsar sang lapnagon nga taktikal nga opensiba para pabayaron sang dako ang berdugong 62nd IB sa tunga sang ginapabugal nga state of Stable Internal Peace and Security (SIPS).