Ang padayon nga operasyon kombat sang 79th IB sa AFP kag 6th SAF sa PNP sa syudad sang Escalante kag mga banwa sang Toboso kag Calatrava sa Negros Occidental ang nagsige dugang sa listahan sang pagpanglapas sa tawhanon nga kinamatarung, ilabi na subong nga naghari sa idu-idu nga rehimen ang tandem nga Marcos-Duterte.

Sa Oktubre 2022 pa lang, madamu nga pagpanglapas sa kinamatarung ang kahimuan sang nasambit nga tropa sang kaaway, ila ginbubu ang kapaslawan sa ila operasyon militar paagi sa pag-atake sang mga indi armado nga mangunguma.

Umpisa Oktubre 19, ang isa ka semana nga kumpanya kadakuon nga operasyon militar sa ginkumbina nga elemento sang 79th IB kag 6th SAF nag-atake sa mga komunidad sang mangunguma sa mga barangay sang Macasilao kag Winaswasan, Calatrava kag mga barangay sang Bug-ang kag Magticol sa Toboso. Indi magnubo sa pito (7) ka mangunguma ang gintaho nga nakaagi sang interogasyon, pagpamahug kag intimidasyon; indi magnubo sa lima (5) ka pamalay ang ginsaka-saka; kag isa (1) ka balay ang gin-ransak diin iligal nga ginkuha ang isa ka handheld radio. Ang mga handheld radio, puli sa mga selpon, ang masami ginagamit sang mga residente para sa komunikasyon bangud wala sang signal sang selpon ang ila lugar.

Sa tunga-tunga sang Oktubre, ang mga mangunguma nagtaho nga ang 79th IB nagkontrol sa giho sang pumuluyo sa Barangay Minapasuk, Calatrava nga nagresulta sa kabudlayan sang mangunguma nga maka-deliber sa ila produkto sa merkado. Madumduman nga ang amu nga mga residente ang naka-eksperyensya sang brutalidad sang AFP sadtong Hunyo 2022. (Basaha: Gipanginwala sa RJPC-BHB ang Armadong Engkwentro sa Minapasuk, Calatrava)

Una nga semana sang Oktubre, ang mga residente sang Barangay Pinapugasan, syudad sang Escalante kag Barangay San Isidro, Toboso nakasinati sang higante nga operasyon kombat diin ang wala mataho nga isip sang mga residente ang naka-eksperyensya man sang interogasyon, pagpapamahug kag intimidasyon kag may ara indi magnubo sa lima (5) ang gintaho nga insidente sang pagkampo sa komunidad, kaangay sang istraktura sa relihiyoso kag panimalay sang sibilyan.

Ang Roselyn Jean Pelle Command – Northern Negros Guerilla Front sa Bagong Hukbong Bayan (RJPC-BHB) ang nag-beripika pa sang impormasyon sa dugang pagpanglapas sa kinamatarung sa panahon sang operasyon kombat sang 79th IB kag 6th SAF sa pipila ka lugar.

Ang reaksyunaryo nga elemento sang 79th IB kag 6th SAF may ara kon tani mandato nga mag-alagad kag magdepensa pero ang ila mga kahimuan nagpakita sa kabaliktaran, rason nga ang mga residente sa norte nga bahin sang Negros makabatyag nga indi luwas kag nagakahadlok sa ila kabuhi panahon nga ang tropa sang kaaway ang magbisita sa ila komunidad.

Ang mga residente naglaragway sa bag-o nga rehimen sang tandem nga Marcos-Duterte bilang pagpadayon sang rehimen US-Duterte diin ang kabuhi sang sibilyan ang wala ginahatagan sang nagakaigo nga importansya para lang malab-ot ang ila tinutuyo militar, sa ingon, dugang nga pagpanglapas sa tawhanon nga kinamatarung ang ginapaabot.

Ang RJPC-BHB balik nga nagapanawagan sa pumuluyo sa norte nga bahin sang Negros nga makighiliusa sa tanan nga nakigbato nga masa kag awayon ang pagpangdomina sa militar. Ang pwersa sang naghiliusa nga pumuluyo ang mas makagagahum kumpara sa riple nga awtomatik kag sa batalyon kadakuon nga operasyon kombat.