Walay kaluoy nga gipatay sa mga ahente sa estado si Rolando Patiño Leyson, Sr., 78, niadtong Setyembre 12 sa Barangay San Pedro, Sison, Surigao del Norte. Lima ka armadong lalaki ang miatake sa iyang balay ug kapin 20 ka hugna siyang gipusil. Gitarget si Leyson tungod lang kay iladong kumander sa Bagong Hukbong Bayan (BHB) sa prubinsya ang iyang anak.

Ayha niini, gipatay usab sa parehong grupo ang drayber sa traysikel nga si Jojie Udtohan Gayoso niadtong Setyembre 8 sa parehong barangay. Si Gayoso ang saligando ni Leyson.

Sa Eastern Samar, gipatay sa mga elemento sa 78th IB ang usa ka lalaking adunay sakit sa pangutok sa Sityo Kabugawan, Barangay Aroganga, Dolores niadtong Agosto 16. Gipusil ang biktima human niya gilabay og lubi ang usa ka sundalo. Naatol nga natagboan nila ang biktima sa lugar kung asa nila naka-engkwentro ang usa ka yunit sa BHB.

Sa Negros Oriental, giaresto si Nonna Espinosa ug lain pang siyam sa Sityo Ilihan, Barangay Buenavista, Guihulngan City niadtong Setyembre 10. Gitago sila sa mga sundalo sa 62nd IB ug wala pa naduaw hangtud karon sa ilang mga pamilya.

Sa Negros Occidental, tulo ka mag-uuma ang gipig-ot sa mga sundalo sa 62nd IB nga nang-utingkay sa Barangay Budlasan, Canlaon City niadtong Setyembre 17. Parehong nag-asikaso sa mga gialimahang kabaw silang Ernie Jacolbe ug Gilbert Reyes dihang gipig-ot sila sa mga sundalo. Gibaharan usab si Romeo, igsuon ni Reyes. Iligal usab nga giransak sa mga sundalo ang mga balay sa Sityo Natuling ug gikawat ang mga kabtangan sa mga residente. Usa pa ka grupo sa kabatan-onan ang gipig-ot sa maong yunit sa kasikbit nga barangay.

Sa Western Samar, nadugangan pa ang mga baryong gimilitarisa sa 87th IB ug 14th IB sa ngalan sa Retooled Community Support Program. Gilangkoban sa operasyon sa militar ang mga barangay sa Hagbay ug Cataydungan sa San Jose de Buan, dugang sa una na nga 33 ka barangay nga ilang giokupa sukad pa niadtong Mayo. Walo sa maong mga baryo ang gihamlet, kung asa duha hangtud tulo ka residente lang ang ginatugutang mogawas sa barangay.

Lider-drayber sa Bicol, giaresto

Gidakop sa giusang pwersa sa militar ug pulis si Ramon Rescovilla niadtong Setyembre 9 samtang pauli siya sa Daraga, Albay. Gitamnan og ebidensyang pusil ug granada ang iyang bag ug gidala sa presinto kung asa siya gikulata. Gipasakahan siya og gama-gamang kasong pagpatay.

Si Rescovilla ang bise presidente sa Pinag-isang Samahan ng mga Tsuper at Operator Nationwide (Piston) ug nagabarog nga tigpamaba sa Condor-Piston Bicol.

Sa Camarines Norte, giaresto ang magsisibya nga si Rommel Fenix ug lain pang upat niadtong Setyembre 15. Gipasakahan sila og kasong libel sa gubernador ug lokal nga upisyal sa prubinsya.

Usa ka adlaw ayha niini, gipusil ug napatay ang magsisibya nga si Jobert Bercasio sa Barangay Cabid-an, Sorsogon City niadtong Setyembre 14. Si Bercasio ang ika-17 nga magsisibya nga gipatay ilalum rehimeng Duterte.