Kalisang ug kasuko ang misugat sa pagtanyag ni Rodrigo Duterte og presidential pardon o absolutong pagpasaylo niadtong Setyembre 6 kang Joseph Scott Pemberton, ang sundalong Amerikanong mipatay sa transgender nga si Jennifer Laude niadtong 2015. Katunga pa lang sa 10 ka tuig nga sentensya ang gidugayon sa iyang pagkapreso.

Sa pamahayag niini niadtong Setyembre 7, gitawag sa Partido Komunista ng Pilipinas ang pagpasaylo isip pagyukno ni Duterte sa gubyerno ug militar sa US, inhustisya sa pamilya ni Laude, ug pagtraydor sa katawhang Pilipino.

Ayha ang pagpasaylo kang Pemberton, aduna nay 10 ka natahong krimen ang mga sundalong anaa sa nasud nga nakapailalum sa Visiting Forces Agreement. Gawas sa usa ka kaso sa pagpanglugos niadtong 2005, tanang mga kaso wala miabot sa mga korte.