Liboan ka mamumuong Pilipino ang nakatakdang mawad-an og trabaho karong Pebrero-Marso human nga magdeklara ang tulo ka kumpanya sa planong magtangtang og empleyado o di kaha magsirado tungod sa pagkalugi.

Niadtong Pebrero 2, gianunsyo sa Philippine Airlines nga manangtang kini og 2,300 ka mamumuo tungod sa pagkahagba sa ihap sa mga nagabyahe sulod ug labas sa nasud. Gibanabana nga 30% kini sa kinatibuk-ang kusog pamuo sa kumpanya. Sa banabana sa rehimen, nawad-an og ₱400 bilyon niadtong 2020 ang industriya sa byahe ug turismo niining milabayng tuig.

Ayha niini, nag-anunsyo usab ang Makati Shangri-la Hotel sa temporaryong pagsira sugod Pebrero 1. Wala pa gibutyag sa kumpanya kung pila ka mamumuo ang tangtangon nito.

Magsirado usab ang pabrika sa Nissan Motors (nagamanupaktura og sakyanan) sa Laguna sigon sa mga plano niining pagminus sa pangkalibutang produksyon niadto pang 2019. Kanhi nang ubos ang demand alang sa mga kotse sa wala pa ang pandemya, ug labaw kining mihagba niadtong milabayng tuig.

Dugang ang maong mga mamumuo sa gibanabanang 5.79 milyong Pilipinong nawad-an og trabaho tungod sa mga restriksyon sa lockdown niadtong 2020. Misigpit ang ekonomiya sa nasud og 9.5% sa tibuok 2020 tungod niini. Pinakagrabe ang maong pagkahagba gikan pa 1946 o human sa Ikaduhang Gubat Pangkalibutan.

Luyo sa kalisud nga nasinati sa mga nawad-an og trabaho, walay programa ang rehimen aron ayudahan sila. Wala silay lauman nga subsidyo tungod kay gibasura sa rehimen ang sugyot sa Department of Labor and Employment nga maggahin sa gamay kaayong ₱20 bilyong minimum nga subsidyo alang kanila sa nasudnong badyet.