Gin-imponer han rehimen Duterte tikang Marso 29 tubtub Abril 11 an ginpahugot nga lockdown (enhanced community quarantine) ha Metro Manila, Cavite, Laguna, Bulacan ngan Rizal. Kahuman ini umabot ha 10,000 an kaso han kadamo nga natapnan han Covid-19. Sigon ha datos han Department of Health (DOH) hadton Abril 1, 72% han kabug-usan nga kaso han impeksyon ha nasud nailista ha mga nasering nga lugar.

Ginsumat liwat han DOH nga umabot na ha 79% han kabug-usan nga ihap han mga intensive care unit bed (631 ha 804) an okupado na yana, samtang 69% naman an ha mga isolation bed (3,143 ha 4,526) ngan 61% naman ha mga ward bed (2,180 ha 3,439). Aada ha “kritikal nga balitang” na liwat an usa ha tulo kaparte (50 ha 152) han mga ospital han National Capital Region, katunga hini an apiki na mapuno ngan an katunga naman puno na ngan diri na akos pa nga kumarawat han mga pasyente. Kalakip dinhi an Philippine Orthopedic Center (75% han kama okupado) diin nahisumat nga nagpositibo ha Covid-19 an 117 ha 180 nga trabahador pankalibsugan hini.

Hadton Abril 4, inabot ha 12,576 an nailista nga inadlaw nga mga bag-o nga kaso, ngan ha 166,715 an kabug-usan nga aktibo nga kaso han Covid-19 ha bug-os nga nasud.