Gibabagan sa mga siyentista, kabatan-onan, relihiyoso ug residente sa Dumaguete City ang plano sa lokal nga gubyerno nga han-okan og yuta o i-reclaim ang baybay sa syudad aron magtukod og usa ka isla nga gitawag niining “Smart City.” Matud sa mga nagprotesta, maapektuhan sa 174-ektaryang reklamasyon ang upat ka Marine Protected Area nga nagsilbing puy-anan sa kapin 200 ka klase sa isda nga labing moapekto sa panginabuhian sa mga mangingisda sa syudad.

Gitugutan sa konseho sa syudad niadtong Hulyo 7 si Mayor Felipe Remollos nga ihatag ang ₱23-bilyong kontrata sa proyektong reklamasyon sa kumpanyang E.M. Cuerpo, Inc. (EMCI) nga kasosyo sa kumpanyang Chinese nga Poly Changda Overseas Engineering Company. Miulbo ang mga protesta sa pagpanguna sa No to 174 Dumaguete Islands ug Kabataan Para Sa Karapatan-Negros Oriental sa misunod nga adlaw.