Gimakmak sa Partido Komunista ng Pilipinas ang designasyon o pagdeklara sa Anti-Terrorism Council sa National Democratic Front of the Philippines isip “terorista.” Gipubliko ang deklarasyon niadtong Hulyo 19 pero niadtong Hunyo 23 pa kini gipirmahan.

Kalabot niini, gimandoan na sa rehimen ang Anti-Money Laundering Council nga sugdan ang pag-freeze sa mga akawnt sa mga indibidwal, organisasyon ug institusyong ginaakusahan niining “adunay kalambigitan” sa NDFP. Posibleng langkob niini ang tanang nakigtinabangay sa NDFP negotiating panel.

Sa ingon, tin-aw nga pagpangandam ang designasyon alang sa malukpanong pag-atake sa mga pwersang patriyotiko, progresibo ug demokratiko nga nagasukol sa pakana ni Duterte nga mokapyot sa poder lapas sa 2022.