Aron magmugna og mini nga hulagway sa suporta alang sa rehimeng Duterte, gigamit sa mga upisyal sa gubyerno ug militar ang ilang mga ginsakpan isip mga troll sa social media aron magpakaylap og mga bakak ug pagpanglingla. Labaw kining napamatud-an kanhi lang dihang mabutyag ang dagan sa Presidential Communication Operations Office (PCOO) ug sa Philippine Air Force (PAF).

Gibutyag sa Commission on Audit (COA) niining Hulyo ang pag-empleyo sa PCOO sa 375 ka kontraktwal nga empleyado nga mga “espesyalista” sa social media ug lain pang porma sa propaganda. Migasto ang PCOO sa kinatibuk-ang ₱70.6 milyon o ₱15,689 kada empleyado sa matag bulan. Kabahin sila sa ginatawag nga “troll farm” sa rehimen.

Sa taho sa COA, nabisto nga nag-report kini og halos susamang trabaho ug mga nakab-ot sa milabayng tuig sa ilang mga pekeng taho.

Samtang nabutyag sa Facebook ang usa ka taho lambigit sa pugos nga pagkontrol sa AFP sa mga personal nga akawnt sa mga sundalo sa air force.

Matud sa taho, ginapugos kuno ang mga empleyado nga i-share sa social media gamit ang Google Forms ang tanang mga ginapagawas nga pamahayag ug balita sa PAF. Adunay mga upisyal nga nagseguro nga ginahimo nila kini ug ang dili motuman ginapahamtangan og multa o aksyong pangdisiplina. Gibutyag sa taho nga rekisito sa matag empleyado sa PAF nga isulat ang ilang pangalan ug serial number sa usa ka online form ug hulagway isip pruweba nga nag-“like” sila sa pamahayag sa ilang mga upisyal.