Nangopra ang upat ka maglulubi sa Sityo Pan-ukan, Barangay Cambuayon, Bacuag, Surigao del Norte bandang alas-3 sa hapon niadtong Hulyo 12 dihang paulanan sila og bala sa 30th IB. Diha-dihang namatay silang Sagloy Destajo ug Richard Lampad, samtang grabeng nasamdan si Benjie Destajo—parehong mga residente sa Barangay Pautao. Giaresto ug iligal karon nga gibilanggo si Julieto Madelo, residente sa Cambuayon.

Giaresto usab silang Julieta Tawidi Gomez ug Niezel Velasco sa gama-gamang kaso sa pagpatay ug sulayng pagpatay sa giusang pwersa sa PNP-NCR ug 4th ID niadtong Hulyo 16 sa Barangay Pansol, Quezon City. Klase-klaseng mga armas ug eksplosibo ang gitanum sa gipuy-an nilang balay.

Si Gomez usa ka Manobo gikan sa San Luis, Agusan del Sur nga kagawad sa konseho sa Kahugpungan sa mga Lumadnong Organisasyon sa Caraga. Samtang si Velasco usa ka koordineytor sa Bread for Emergency and Development, usa ka institusyon nga aktibo sa paghatag og ayuda ug tabang sa mga biktima sa kalamidad sa Caraga.