Mga protestang bayan

,

Luwas nga balik-eskwela, ipakigbisog. Nagsumite og petisyon ang mga organisasyong myembro sa Back to School Network-Panay sa lokal nga upisina sa CHED ug DepEd sa Iloilo City niadtong Hulyo 22. Duso nila nga luwas nga subling ablihan ang mga klase ug suportahan sa pangrehiyong mga ahensya ang ₱10,000 ayuda alang sa mga estudyante.

Nagprotesta usab ang mga estudyante sa Holy Angel University (HAU) atubangan sa ilang eskwelahan sa Angeles City, Pampanga niadtong Hulyo 15, unang adlaw sa ilang klase. Duso sa mga estudyante nga ipatuman ang lima ka puntong demanda para mohaum sa remote learning. Nagsumite ang mga lider-estudyante og apela sa upisina sa presidente sa HAU sa parehong adlaw.

Buligay sa ECQ. Gilunsad sa Defend Jobs Philippines ang kampanyang Flag Brigade PH niadtong Agosto 6 kung asa balay-balay kining manghatag og mga donasyong pagkaon sa matag pamilya. Una nang nanghatag ang grupo og mga banderitas nga lunhaw (adunay ipanghatag nga donasyon) ug pula (kinahanglan og donasyon) aron magsilbing timailhan sa ilang paglibot sa 200 ka kabalayan sa Sampaloc, Manila. Matud kanila, kabahin kini sa pagkiha sa rehimen sa kawalay ayuda sa ikatulong enhanced community quarantine sa Metro Manila.

Presyo sa lana, paubsan. Nagpiket ang mga mamumuo ilalum sa Kilusang Mayo Uno duul sa Philcoa sa Quezon City niadtong Agosto 4 aron kundenahon ang bag-ong serye sa pagsaka sa presyo sa petrolyo ug LPG. Misaka ang presyo sa gasolina og ₱1.05/litro samtang ₱0.75/litro ug ₱0.80/litro sa kerosene ug diesel.

Mga protestang bayan