Upat ka mag-uuma ang gipatay sa Bicol ug upat usab ang giaresto sa mga pwersa sa estado sa mga adlaw ayha ang State of the Nation Address ni Rodrigo Duterte.

Gipatay sa mga pulis silang Jemar Palero, myembro sa Organisasyon sa mga Magsasaka sa Albay ug Marlon Naperi sa Albay People’s Organization, gabii sa Hulyo 25, sa Banao Bridge, Maharlika Highway, Guinobatan, Albay. Nagapintal kanhi ang duha, kauban ang duha pa ka aktibista, sa panawagang “Duterte Ibagsak!” sa haywey. Gipagawas sa mga pulis nga “misukol” ang duha butang nga gipanghimakak sa ilang mga pamilya. Ulahing nakitang buhi ang duha samtang gisakay sa mga pulis sa usa ka van.

Gipatay usab sa mga sundalo silang Louie Austria ug Benjamin Delos Santos sa Sagñay, Camarines Sur niadtong Hulyo 20. Gipagawas sa mga elemento sa 83rd IB nga napatay sila sa usa ka engkwentro ug nagparada pa sa 12 ka tag-as nga kalibre sa mga pusil nga nakuha kuno sa panagsangka.

Iligal nga pag-aresto. Iligal nga giaresto sa militar ug gikasuhan sa paglapas sa Anti-Terror Law ang upat ka mag-uuma sa Sityo Buscad, Barangay Tuban, Sablayan, Occidental Mindoro niadtong Hulyo 19. Giakusahan silang Miguel Manguera, Fe Marinas, Sherlito Casidsid ug Allen Dela Fuente nga nagatabang sa Bagong Hukbong Bayan ug gilambigit sa engkwentro tali sa AFP ug hukbong bayan niadtong Hulyo 5. Gikasuhan ang duha kanila og illegal possession of firearms and explosives samtang obstruction of justice sa laing pang duha.

Sa Sorsogon, giaresto sa mga pulis ang magtiayong Ruel Llamera ug Annie Jean Castillo, mga myembro sa Sorsogon People’s Organization niadtong Hulyo 8 samtang nagabyahe pauli sa Sorsogon City. Gipasakahan sila sa gama-gamang kasong illegal possession of firearms and explosives.

Pagpanghasi. Paturagas nga nagpabuto ang mga elemento sa 62nd IB ug 16th Scout Ranger Company sa Barangay Banwage, Guihulngan, Negros Oriental niadtong Hulyo 15. Gilabay usab nila og granada ang balay ni Alo Lojanio, residente sa Sityo Kapudlusan.

Sa Northern Samar, pugos nga gipapirma sa mga sundalo ang mga upisyal sa barangay sa 17 ka baryo sa Las Navas, 14 ka baryo sa Silvino Lobos, unum ka baryo sa Pambujan, usa ka baryo sa Catubig ug tanang baryo sa Matuguinao aron ideklarang persona non grata ang BHB.

Pagpanganyon. Niadtong Hulyo 20 hangtud 21, gikanyon sa 87th IB ang kalasangan sa Km. 14 hangtud Km. 17 sa San Jose de Buan, Western Samar. Dili moubos sa 20 ka hugna nga nagpabuto ang AFP sa magkasunod nga adlaw nga nagresulta sa pagkaguba sa mga umahan ug nagtukmod sa mga residente sa Sityo Salvacion, Barangay San Nicolas nga temporaryong mobakwit.

Sa Northern Samar, duha ka balay ang naigo dihang nagpabuto ang PNP-Special Action Force og grenade launcher niadtong Hulyo 10 sa Barangay Hitapian, Catubig. Target niini ang yunit sa BHB nga naglunsad og opensiba sa parehong adlaw. Kadungan niini, gikawat sa pulis ang ginabaligyang pinya sa mga residente. Gihulga usab nila ang mga upisyal sa barangay.

Pagbakwit. Sa Northern Samar, gitaho sa Hulyo 30 sa Larab nga nagbakwit ang mga residente sa Barangay San Jose, Las Navas tungod sa paturagas nga pagpamomba. Sa mga baryo sa Sag-od, Epaw ug San Jose sa maong lungsod, halos wala nay nabiling tawo tungod sa okupasyong militar. Ingon niini usab ang nahitabo sa mga baryo sa Senonogan de Tubang, Hiyaot, ug Balod sa Silvino Lobos. Nagbakwit usab ang mga residente sa Barangay Ligaya ug Barangay Carolina nga anaa sa utlanan sa Matuguinao, Western Samar.