Human sa mando ni Rodrigo Duterte, paspas nga giaprubahan sa iyang mga alipures sa Kongreso niadtong Setyembre 30 sa ikaduha ug ikatulong pagbasa ang sugyot nga badyet alang sa 2022 bisan og nabulit kini sa anomalya.

Ang ₱5.02 trilyong sugyot nga badyet ang pinakadaku sa kasaysayan sa nasud. Kabahin niini ang ₱8.2 bilyong badyet sa Office of the President. Kapin katunga niini (₱4.5 bilyon) alang sa “intelligence and confidential funds” nga wala ginapahibalo sa publiko kung paunsa gigamit.

Tataw usab ang dehado nga pagtubag sa pandemya ug pangpublikong panglawas luyo sa pagkahagba sa nasud sa kumunoy sa Covid-19. Walay gigahin nga badyet alang sa bag-ong gamit o imprastruktura sa 72 ka pangpublikong ospital, bisan og hilabihan na kining nadat-ogan sa pagdawat sa mga pasyenteng adunay Covid-19. Wala usay badyet alang sa Research Institute for Topical Medicine nga usa sa nag-unang mga nagproseso sa mga testing para sa Covid-19.

Lakip sa mga gikibhangan og badyet ang Philippine General Hospital, nga gigahinan lamang og ₱5.66 bilyong badyet. Gikibhangan usab og ₱14 bilyon ang badyet sa gamit ug operasyon sa 64 ka pangpublikong ospital.

Wala usay pondo alang sa benepisyo sa mga mamumuo sa panglawas nga anaa atubangan sa pagsumpo sa pandemya. Gikibhangan usab ang kanhi nang kulang nga badyet alang sa mga serbisyong panglawas ug mga gamit sama sa mga personal protective equipment. Ang pondo usab alang sa mga booster shot nga bakuna gitagad nga dili-programado ug ginapangitaan pa og pondo, o kaha mangutang pa.